Kombëtarja e Kosovës ka zhvilluar sot stërvitjen e fundit para përballjes së rëndësishme me Suedinë, që do të luhet të hënën në Goteborg, në kuadër të kualifikimeve për Kampionatin Botëror 2026.
Seanca përmbyllëse u mbajt në Kampin Nacional të FFK-së në Hajvali, nën drejtimin e përzgjedhësit Franco Foda, i cili u fokusua kryesisht në aspektin taktik dhe në detajet e fundit të lojës që do të zbatohet kundër suedezëve.
Stërvitja u zhvillua pa ngarkesa të mëdha fizike, ndërsa atmosfera në skuadër mbetet pozitive dhe futbollistët duken të përqendruar dhe të motivuar për të dhënë maksimumin në fushë.
Mundesh me e lexu edhe…
Nga grumbullimi është liruar Elvis Rexhbeçaj, i cili nuk ka arritur të rikuperohet plotësisht nga lëndimi i pësuar në ndeshjen ndaj Sllovenisë.
Dardanët do të udhëtojnë sot në orën 15:00 drejt Goteborgut, ku nesër pritet të zhvillohet ndeshja që do të jetë një tjetër test i rëndësishëm për përfaqësuesen e Kosovës në rrugën drejt Botërorit./Katror.info
