Presidentja e Kosovës, Vjosa Osmani, është pritur në takim nga Zëvendëssekretari i Shtetit Amerikan, Christopher Landau, gjatë vizitës së saj në Washington D.C. Takimi u zhvillua në kuadër të përpjekjeve për forcimin e marrëdhënieve strategjike ndërmjet Kosovës dhe Shteteve të Bashkuara të Amerikës.
Zëdhënësja e Departamentit të Shtetit, Tammy Bruce, konfirmoi takimin dhe tha se diskutimi u përqendrua në mundësitë për thellimin e bashkëpunimit ekonomik mes dy vendeve.
“Zëvendëssekretari i Shtetit Christopher Landau u takua me Presidenten e Kosovës Vjosa Osmani-Sadriu. Ata diskutuan fushat e mundshme të bashkëpunimit ekonomik në të ardhmen dhe shprehën besimin se prosperiteti dhe bashkëpunimi ekonomik do të ndihmojnë Ballkanin Perëndimor të lëvizë nga përçarjet e së kaluarës dhe do të promovojnë paqe dhe stabilitet të qëndrueshëm në rajon”, u shpreh Bruce.
Mundesh me e lexu edhe…
Në një postim në Facebook, Presidentja Osmani falënderoi Landaun për mikpritjen dhe diskutimin konstruktiv.
“Kosova qëndron krah për krah me Shtetet e Bashkuara për të ndërtuar kapituj të rinj të bashkëpunimit strategjik, në përputhje me vizionin e fortë të Presidentit Trump. Më shumë siguri. Më shumë zhvillim. Më shumë mundësi për qytetarët tanë dhe bizneset tona”, shkroi ajo.
Vizita e Osmanit në SHBA konsiderohet si pjesë e një agjende më të gjerë për forcimin e partneritetit transatlantik dhe avancimin e objektivave të përbashkëta për paqe dhe mirëqenie në Ballkanin Perëndimor./Katror.info
