Filmi i shkurtër dokumentar me skenar dhe regji nga Alban Muja, “Mua besoj më shpëtoi portreti” (I Believe the Portrait Saved Me), pati premierën e tij rajonale në Festivalin e Filmit të Sarajevës. Ky produksion është pjesë e konkurrencës zyrtare për çmimin “Zemra e Sarajevës” në seksionin e filmave dokumentarë, si dhe i përfshirë në kategorinë European Short, shkruan Katror.info.
Pas shfaqjes së filmit, regjisori Alban Muja dhe producenti Edon Rizvanolli iu përgjigjën pyetjeve të publikut, krahas kineastëve të tjerë rajonalë dhe ndërkombëtarë, në të dyja seksionet ku filmi është i nominuar.
Nominimi paralel në dy kategori të ndryshme është vlerësuar si rast i rrallë dhe i veçantë, duke u pritur me krenari nga ekipi i filmit dhe Qendra Kinematografike e Kosovës./Katror.info.
