Pas një jave të mbushur me art, emocione dhe energji teatrale nga vende të ndryshme të botës, nata finale e edicionit të nëntë të “Prishtina International Theatre Festival – Burbuqe Berisha” u mbyll në mënyrë madhështore në Teatrin “Faruk Begolli” në AAB, shkruan Katror.info.
Në skenë, shfaqja komike nga Kosova “The Lie”, me regji të Agon Myftarit, solli reflektim, të qeshura dhe momente delikate të marrëdhënieve në çift – duke shërbyer si prelud i përkryer për çastin më të pritur të mbrëmjes: ndarjen e çmimeve.
Në mesin e artistëve, mysafirëve dhe dashamirëve të teatrit, të pranishëm ishte edhe Kryeministri i Kosovës, Albin Kurti, i cili ndau çmimin kryesor “Shfaqja më e mirë” – që këtë vit shkoi për Bosnjën dhe Hercegovinën me shfaqjen “Purple”.
Mundesh me e lexu edhe…
Kjo vepër triumfoi gjithashtu me çmimin “Aktorja më e mirë” dhe “Shfaqja më e mirë e zgjedhur nga juria e mediave”.
“Me thënë të drejtën, ekipi jonë që luajti shfaqjen ‘Purple’, po shpresonim që ka një mundësi të fitonim diçka, një çmim, por tre çmime nuk e prisnim, me të vërtetë. Ishte shumë emocionale për mua dhe më vjen keq që jam sonte vetëm këtu pa komplet ekipin, por jemi shumë mirënjohës dhe falënderojmë shumë jurinë, Festivalin Ndërkombëtar të Teatrove në Prishtinë që na zgjodhën neve dhe na dhanë këtë mundësi”, tha ajo.
Francezët u vlerësuan me Cmimin “Special Mention” për shfaqjen mbresëlënëse “On the Heart of the Rose”, nën regjinë e Patrick Alluin.
“Jam shumë e lumtur dhe e surprizuar sepse per neve ishte shumë përvojë e veçantë, përvojë franko-kosovare, jam shumë e lumtur për të gjithë ekipin tim, është nder të jem këtu t’u tregoj kosovarëve historinë e Consuelos dhe Antoine de Saint-Exupéry”, tha ajo.
Shfaqja nga Kosova, “God Bless America”, u nderua me dy çmime – për Aktorin më të mirë në rol dytësor dhe Shfaqjen më të mirë të zgjedhur nga juria e studentëve.
Ndërkohë, Izraeli u shpërblye për Aktoren më të mirë në rol dytësor, me interpretimin e Ofer Zeigeinbom në shfaqjen “Family on a Train”.
”Sigurisht jam shumë e lumtur dhe shumë krenare për kolegen Ofer, ajo është një aktore e mrekullueshme dhe jam e surprizuar sepse kurrë nuk e dijmë se si mund të shkojë një garë si kjo, por jam shumë e lumtur sepse mendoj që ajo e meriton, është nje aktore shumë e mirë, mendoj që ky është fillimi i edhe më shumë aktorëve e shfaqjeve që do marrin pjesë ne Festivalin në Prishtinë”, tha ajo.
Dhe Greqia, gjithashtu, u largua me dy çmime, duke përmbyllur një edicion ku teatri ndërkombëtar u bashkua në Prishtinë për të treguar histori që na përkasin të gjithëve.
Pas festivalit qëndron një punë e palodhshme dhe përkushtim i jashtëzakonshëm nga të gjithë organizatorët, të cilët punuan me pasion për të sjellë një ngjarje të suksesshme dhe me nivel të lartë artistik. /Katror.info
