Fjalori i Cambridge-it ka shtuar disa terma të rinj në përmbledhjen e tij më të fundit – “skibidi”, “delulu”, “tradwife” si grua tradicionale dhe “broligarchy” si oligarkia e burrave.
Në shikim të parë, ato mund të duken thjesht si fjalë kalimtare, të lindura nga humori i TikTok-ut apo absurditetet e YouTube-it. Por në të vërtetë, këto njësi gjuhësore pasqyrojnë realitete shumë më të thella – shpesh shqetësuese të brezit të ri dhe të shoqërisë sonë në tërësi, shkruan Independent.
“Skibidi” vjen nga fenomeni Skibidi Toilet, një seri groteske online ku tualetet me fytyra njerëzish këndojnë dhe luftojnë me qenie që kanë koka pajisjesh elektronike.
Mundesh me e lexu edhe…
Me 23 miliardë shikime vetëm në TikTok deri në korrik të vitit të kaluar, ky univers absurd është shndërruar në një nga simbolikat më të forta të kulturës digjitale të brezit Alpha.
Aq i popullarizuar është bërë sa që, sipas mediave, pritet të shndërrohet edhe në film të madh kinematografik.
Ndërkohë, fjala “delulu” – shkurt për iluziv – përkufizohet nga Cambridge si “të besosh gjëra që nuk janë reale ose të vërteta, zakonisht sepse zgjedh ta bësh këtë”.
Për brezin që jeton në një botë ku teoritë e konspiracionit, lajmet e rreme dhe faktet alternative qarkullojnë më shpejt se çdo e vërtetë shkencore, ky term është më shumë se një shaka e internetit: është shenjë e një realiteti ku e vërteta është vënë në diskutim të përhershëm.
Fjala “tradwife” – bashkim i “tradicionale” dhe “grua” – sjell një konotacion më të errët.
Ajo nuk nënkupton vetëm një grua shtëpiake tradicionale, por një nën kulturë të tëra vajzash dhe grash që, duke predikuar “jetën tradicionale” në rrjete sociale, shpesh promovojnë ide regresive dhe antifeministe për rolin e gruas.
Në TikTok e platforma të ngjashme, “tradwife” është kthyer në trend, duke ringjallur debatin mbi barazinë gjinore dhe ndikimin që këto mesazhe kanë te gjeneratat e reja.
Në anën tjetër të spektrit qëndron “broligarchy”, një term i ri që përshkruan “një grup të vogël burrash, zakonisht nga industria e teknologjisë, jashtëzakonisht të pasur e të fuqishëm, të cilët kanë ose synojnë ndikim politik”. Në një botë ku emrat si Elon Musk apo Mark Zuckerberg ushtrojnë ndikim global – jo vetëm ekonomik, por edhe politik e kulturor – kjo fjalë tingëllon si përshkrim i përditshmërisë.
