Sot në Pejë, u nënshkrua një marrëveshje e rëndësishme ndërmjet Ambasadës së Francës në Kosovë dhe festivalit Anibar, duke lansuar zyrtarisht projektin e madh “Génesis”. Ky projekt ka për qëllim të ofrojë trajnim për deri në 65 të rinj kosovarë profesionistë të animacionit. Financuar nga Ministria Franceze për Evropën dhe Punët e Jashtme, “Génesis” do të implementohet bashkërisht nga Instituti Francez i Kosovës dhe Anibar.
Gjatë ceremonisë së nënshkrimit, Drejtori Ekzekutiv i Anibarit, Vullnet Sanaja, mbajti një fjalim duke theksuar rëndësinë e projektit Génesis dhe bashkëpunimin e ngushtë ndërmjet Anibarit dhe partnerëve francezë.
“Është një gëzim i madh të ju mirëpres në inaugurimin e projektit Génesis së bashku me Ambasadën Franceze dhe Ansitu Franse. Në Anibar, ne jemi të përkushtuar të krijojmë një platformë ku njerëzit me interes në animacion mund të takohen, krijojnë, shikojnë filma dhe lidhen përmes festivalit tonë”, tha Sanaja.
Mundesh me e lexu edhe…
Ai theksoi se përmes punës së Akademisë së Animacionit në vitet e fundit, Anibar ka mundur të mbështesë rritjen e një komuniteti të profesionistëve të rinj kreativë. “Sot, me partnerët tanë ne nisemi në një udhëtim të ri me projektin Génesis, një dëshmi e përpjekjeve tona të vazhdueshme për të mbështetur dhe ngritur sektorin e animacionit në Kosovë. Ky projekt synon të fuqizojë të rinjtë kosovarë të angazhuar në animacion, multimedia dhe video lojëra, duke i ndihmuar ata të shndërrojnë pasionet e tyre krijuese në karriera të suksesshme”.
Sanaja gjithashtu shprehu gëzimin për bashkëpunimin e vazhdueshëm me Ambasadën Franceze dhe Ansitu Franse. “Mbështetja e ofruar nga partnerët tanë francezë ka qenë e paçmueshme në misionin tonë për të promovuar një zhvillim të qëndrueshëm dhe të shëndetshëm të sektorit të animacionit në Kosovë”, tha ai.
Pas fjalimit të Sanajës, Ambasadori Francez, Olivier Guérot, foli për rëndësinë e projektit Génesis dhe lidhjet e forta kulturore ndërmjet Francës dhe Kosovës.
“Çfarë kënaqësie është të jem këtu me ju dhe të lansojmë projektin tonë të ri Génesis me partnerin tonë afatgjatë Anibar. Është gjithmonë mirë të flasësh për kinemanë, animacionin dhe krijimtarinë si një tërësi, si ambasador i një vendi që ka dëshmuar prej kohësh dashurinë e tij për kinemanë në të gjitha format e saj. Siç mund ta dini, industria audiovizuale në Francë luan një rol shumë të rëndësishëm në identitetin tonë, kulturën tonë dhe ekonominë tonë. Më shumë se 250,000 njerëz janë të punësuar në rreth 13,000 kompani në të gjithë Francën,” tha Ambasadori Guérot.
Ai theksoi vlerën e kontributeve të Kosovës në skenën ndërkombëtare të industrisë kulturore dhe krijuese, duke thënë: “Vendi juaj po prodhon filma të cilësisë së lartë, të njohur ndërkombëtarisht, në Oscars, në Cannes, në Venice dhe në shumë festivale dhe ceremoni të tjera të ndarjes së çmimeve. Është vetëm natyrale për ne në Ambasadë të bashkëpunojmë me aktorë nga Kosova. Ne kemi mbështetur dhe kemi punuar me Anibar, me Dokufest jo vetëm gjatë festivaleve të tyre por edhe gjatë Javëve tona vjetore të Frankofonisë”.
Ambasadori Guérot detajoi strukturën e projektit Génesis, duke shpjeguar tri fazat kryesore: trajnimin, përshpejtimin dhe organizimin e një panairi të sipërmarrjes së re të përbashkët franko-kosovare. “Objektivi kryesor i këtij projekti është të ndihmojë të rinjtë profesionistë kosovarë në animacion të krijojnë mikrondërmarrjet e tyre në një përpjekje për të rritur sipërmarrjen në vend dhe me efekte që shtrihen përtej Kosovës”.
Ai gjithashtu shtoi: “Faza e parë është trajnimi, e cila do të jetë më e gjata. Gjatë kësaj faze, rreth 65 studentë të pre-kualifikuar dhe premtues do të trajnohen nga Anibar dhe Instituti Francez në animacion dhe në gjuhën frënge. Ky trajnim do t’i ndihmojë gjithashtu studentët të përcaktojnë një rrugë më të qartë për karrierën e tyre. Drejt fundit të trajnimit, disa studentë do të kenë mundësinë të bëjnë udhëtime studimore në Francë me profesionistë të fushës”.
Faza e përshpejtimit do të pasohet, ku studentët do të përgatisin prezantime projektesh që do të vlerësohen nga një komitet ekspertësh. Studentët e përzgjedhur do të punojnë për krijimin e mikrondërmarrjeve të tyre me ndihmën e mentorëve. Faza përfundimtare do të jetë organizimi i një panairi të sipërmarrjes së re franko-kosovare, ku studentët pjesëmarrës do të bashkëveprojnë me kompani franceze.
Ambasadori Guérot përfundoi duke shprehur entuziazmin e tij për projektin: “Unë besoj fort se ky projekt do të përfitojë shumë aktorë, në Kosovë dhe në Francë. Do të ndihmojë në ngritjen e një brezi të ri të talentuar të profesionistëve të animacionit. Mezi pres të fillojmë këtë projekt emocionues dhe premtues me Anibar”.
Marrëveshja për projektin Génesis shënon një hap të rëndësishëm përpara për sektorin e animacionit në Kosovë, duke u ofruar të rinjve talente burimet dhe mbështetjen e nevojshme për të lulëzuar në industrinë krijuese. Ky bashkëpunim nënvizon lidhjet e forta kulturore ndërmjet Francës dhe Kosovës dhe krijon një rrugë premtuese për përpjekje të ardhshme krijuese.
Përgatiti:
