Nga Majlinda tek Edita, nga Feridja tek Hiljminjeta, nga Kaqusha tek Teuta, nga Gordana tek Mirjeta e nga Mimoza tek Jeta. Janë këto gra që janë përzgjedhur në ekspozitën “Gratë udhëheqëse në fokus”, të kuratores Eliza Hoxha dhe fotografit Arben Llapashtica, për të cilat u tha se “kemi shumë për të mësuar, për t’u frymëzuar, dhe për t’u krenuar.”
Qëllimi i kësaj ekspozite është t’i shtjellojë nuancat e pozitës së grave në Kosovë dhe t’i shpalosë, çmojë dhe njohë kontributet e tyre të shumëllojshme nëpër aspekte të ndryshme të shoqërisë, duke shërbyer kështu edhe si burim frymëzimi për shumë gra të reja në Kosovë.
Në hapësirat e Qendrës “Barabar” vizitorët kanë pasur mundësi të shohin portretet e grave që kanë thyer normat normat patriarkale duke u bërë model për vajzat e gratë tjera. Aty u bë thirrje që t’i gëzohemi këtyre grave derisa ato janë në mesin tonë, t’i fuqizojmë, sepse kështu fuqizohet edhe Kosova si shoqëri.
“Këto gra që i shihni sot janë vetëm disa nga pishtarët e shumta që i ka Kosova që në forma të ndryshme kanë thyer tabu, kanë kapërcyer mendësi patrarkale, kanë krijuar hapësira për vete pa e ditur se po krijojnë agjendë për gratë e reja. Por, si për çudi e si për habi, ne në shumësi, i festojmë kur ato më nuk janë. Edhe për gratë që nuk janë në mesin tonë, kjo ekspozitë vjen si një zile dhe si një diell për të na kujtuar se duhet t’i festojmë ato sa janë në mesin tonë, të gëzohemi për kontributin e tyre, të jemi me to, ato me ne të mësojmë shumë nga ato, të inspirohemi, të frymëzohemi nga ato, dhe t’ua japim vendin dhe meritën për kohën kur ato kanë kontribuar sepse e kanë bërë pak më të lehtë për neve e ne duhet ta bëjmë pak më të lehtë për ato vajza dhe gra tjera,” tha kuratorja e ekspozitës Eliza Hoxha.
E për gratë nuk është gjithmonë e lehtë që të gjenden në fokus, apo të jenë udhëheqëse, siç e thotë edhe Reyes Charle Cuellar, këshilltare për çështje gjinore në Zyrën e BE-së në Kosovë.
Sipas saj ajo që kërkohet nga gratë është gjithmonë më shumë, sepse “ato duhet të kenë kapacitete, duhet të kenë lidership dhe duhet ta tregojnë jo shumë, sepse mund ta mëzisin dikë, duhet të kenë qëndrueshmëri.”
“Isha dje me Editën (Tahiri) në margjinat e forumit (Gratë, Paqja dhe Siguria) dhe ajo priste ta jepte një intervistë me gazetarë dhe tha prit një moment se më duhet të vë buzëkuq. Sepse ne në veçanti në moshën tonë duhet të dukemi bukur, por nëse je një e re, nuk duhet të dukesh shumë bukur, dhe jam e sigurt se dikush si Mimoza (Gavrani) e ka vuajtur këtë. Duhesh të jesh e fortë, por jo edhe shumë e fortë, jam e sigurt se Jeta (Xharra) është kritikuar shpesh herë pse është shumë direkte, apo shumë e fortë.”
Zëvendës Shefja e UNMIK-ut, Barrie Lynne Freeman lartëson figurat e grave në ekspozitë.
“Ato janë kaq të shquara, të guximshme dhe pionere që sfiduan nromat patrairkale dhe vendsosen shembull të fuqishëm të grave në shërbimin publik në sektorë të ndryshëm dhe ndër breza. Ju jeni inspirim për të gjithë neve, për motrat, fëmijët tuaj dhe për krejt Kosovën,” tha Barrie Lynne Freeman, Zëvendës shefe e UNMIK-ut.
Ngjyra e verdhë në ekspozitën “Gratë udhëheqëse në fokus” u përzgjodh meqë flet për empatinë, për mendimet jashtë kutisë për qasje inovative dhe kreative. Thëniet frymëzuese të grave rrodhën me shiritin e verdhë të lidershipit që karakterizohet nga stili inovativ, vlerat kreative dhe mendimet jashtë kutisë. Ekspozita e OJQ Integra u mbështet nga UNMIK-u./Katror.info