Që nga sot, qytetarët e Kosovës mund të aplikojnë për Programin për Mbrojtjen e Konsumatorëve të Cenueshëm të Energjisë Elektrike 2025–2026, që synon të mbështesë familjet me të ardhura të ulëta gjatë stinës së dimrit.
Aplikimet bëhen përmes platformës eKosova, në rubrikën Shërbimet – Grante dhe Subvencione, përmes linkut: https://ekosova.rks-gov.net/562.
Sipas njoftimit zyrtar, familjet që kanë aplikuar vitin e kaluar nuk kanë nevojë të riaplikojnë, pasi të dhënat e tyre janë bartur automatikisht për vitin 2025. Por në rast se kanë ndryshuar ndonjë informacion, si numri i anëtarëve të familjes, vendbanimi apo njehësori elektrik, ato mund të përditësohen lehtësisht në formularin ekzistues para se të dërgohet aplikimi.
Mundesh me e lexu edhe…
Programi është i dedikuar për shtetasit e Republikës së Kosovës me të ardhura deri në 150 euro për anëtar të familjes dhe me pasuri të paluajtshme deri në 100 mijë euro. Subvencioni llogaritet në bazë të të ardhurave mesatare të familjes dhe shumës së faturës së energjisë elektrike për muajin përkatës.
Autoritetet njoftojnë se afati për aplikim është gjashtëmujor, por bëjnë thirrje që aplikuesit e rinj dhe ata që kanë ndryshime në të dhëna të aplikojnë brenda muajit tetor, pasi pagesat retroaktive nuk do të realizohen.
Ky program vlerësohet si një nga masat kryesore sociale për të lehtësuar barrën ekonomike të familjeve më të cenueshme, veçanërisht gjatë muajve të ftohtë të vitit./Katror.info
