Kompania kineze Huawei ka prezantuar zyrtarisht laptopin e parë me sistemin operativ të zhvilluar nga vetë ajo – HarmonyOS 5, i njohur gjithashtu si HarmonyOS Next, raporton Katror.info.
Sipas raportimit të medieve kineze, pajisja do të publikohet më 19 maj 2025, por detajet janë ende të kufizuara.
Deri më tani dihet se sistemi operativ do të mbështesë aplikacione për kompjuter dhe disa aplikacione për telefon, ndërsa vizualisht ngjan me një përzierje mes macOS dhe Windows, por me ikona në stil mobil.
Mundesh me e lexu edhe…
Laptopi do të vijë i pajisur me asistentin digjital Celia, i cili mund të krijojë prezantime, të përmbledhë takime ose të kërkojë të dhëna në dokumente lokale, nëse i jepet qasje përmes softuerëve të nevojshëm.
Ndër aplikacionet e parapërfshira janë paketa WPS Office (një alternativë për Microsoft Office), platforma DingTalk nga Alibaba për punë në grup, si dhe aplikacione të njohura kineze si RedNote (popullarizuar pas ndalimit të TikTok në SHBA), Bilibili dhe Feishu nga ByteDance. Deri në fund të vitit, pritet të mbështeten mbi 2,000 aplikacione.
Sa i përket dizajnit, laptopi i ri ngjan me modelin MateBook X Pro, ka tre porte USB-C dhe mban mbishkrimin HarmonyOS në kapakun e sipërm.
Ky zhvillim vjen pasi Huawei e nisi HarmonyOS fillimisht për telefonët inteligjentë pas ndalimit të përdorimit të Android, dhe tani, nën kërcënimin për humbjen e qasjes në Windows, ka filluar ta përshtasë për kompjuterët personalë./Katror.info
