I publikuar në British Medical Journal (BMJ), studimi ka nxjerrë në pah se trajtimi me ilaçe për personat e sapo diagnostikuar me ADHD (Çrregullim i Deficitit të Vëmendjes dhe Hiperaktivitetit) ofron përfitime më të gjera sesa vetëm menaxhimi i simptomave të përditshme.
Sipas gjetjeve, përdorimi i medikamenteve lidhet me ulje të ndjeshme të rrezikut për abuzim me substanca, tentativa vetëvrasjeje, aksidente rrugore dhe sjellje kriminale.
Sipas raportimit të BBC-së, studimi përfshiu 148 mijë e 500 persona të moshës 6 deri në 64 vjeç në Suedi. Nga ta, 57% nisën trajtimin me ilaçe – dhe 88% e këtyre morën metilfenidat (i njohur gjerësisht si Ritalin). Rezultatet treguan një ulje prej 17% të rasteve të para të sjelljes suicidale, 15% të abuzimit me substanca, 12% të aksidenteve rrugore dhe 13% të kriminalitetit.
Mundesh me e lexu edhe…
Kur u analizuan ngjarjet e përsëritura, reduktimet ishin edhe më të dukshme: 25% më pak kriminalitet dhe abuzim me substanca, 15% më pak tentativa vetëvrasjeje dhe 16% më pak aksidente rrugore.
Sipas Samuele Cortese nga Universiteti i Southampton-it, këto përfitime shpjegohen nga aftësia e ilaçeve për të ulur impulsivitetin dhe shpërqendrimin – dy simptoma kyçe të ADHD-së – duke zvogëluar kështu gjasat për aksidente, sjellje agresive dhe përfshirje në situata me rrezik të lartë.
Megjithatë, studiuesit theksojnë se, edhe pse dizajni i studimit ishte sa më i fortë që të ishte e mundur, nuk mund të përjashtohet ndikimi i faktorëve të tjerë, si gjenetika, stili i jetesës apo ashpërsia e gjendjes.
Qasja në trajtimin farmakologjik të ADHD-së mbetet sfiduese në shumë vende. Në Mbretërinë e Bashkuar, për shembull, pritja për të parë një specialist pas diagnozës dhe për të filluar trajtimin mund të zgjasë disa vite, ndërkohë që në treg ka periudha me mungesa të medikamenteve.
Ian Maidment nga Aston University e vlerëson studimin si një hap të rëndësishëm përpara në kuptimin e potencialit të këtyre barnave, por thekson se kërkimi nuk analizoi nëse pacientët i morën rregullisht ilaçet apo ndikimin e dozave të ndryshme./AP/Katror.info
