Student i shkëlqyer dhe aktivist i përkushtuar, me interes kyç në përmirësimin e cilësisë së jetesës, sidomos tek të rinjtë. Është ky 23 vjeçari, Ilir Kiçmari, i cili vullnetarisht merret me aktivitete të ndryshme që përfshijnë, teknologjinë, të drejtat e njeriut dhe fusha të tjera, që prekin jetën e shoqërisë.
“Jam bashkëthemelues i Organizatës Iniciativa Studentore për Novacion SIN68, e cila ka për qëllim rritjen e aktivizimit studentor në Qendrën e Studentëve dhe në përgjithësi ë Kampusin e Universitetit të Prishtinës. Në fillim të vitit 2024 bëhen dy vjet prej kur ne operojmë. Kemi bërë qindra aktivitete, duke filluar nga aktivitetet edukativo – arsimore, e deri tek ato relaksuese, sportive, kulturore e kështu me radhë”, u shpreh Iliri.
Si student i shquar i shkencave kompjuterike, Iliri gjithashtu ndan njohuritë e tij në shkencat kompjuterike duke punuar si instruktor në një Shkollë Digjitale. Ai gjithashtu ka ndihmuar Asociacionin e Gazetarëve të Kosovës si asistent projekti. Iliri njohuritë e tij teknologjike – shkencore ka nisur t’i zbatojë në projektet vullnetare të digjitalizimit, duke synuar të investojë në një të ardhme më pozitive në Kosovë dhe më gjerë.
Mundesh me e lexu edhe…
“Digjitalizimi është komponentë shumë e rëndësishme, tash me zhvillimin e inteligjencës artificiale, e cila tashmë ka marrë një hov shumë të madh edhe global, po edhe në Kosovë. Në Qendrën e Studentëve kemi provu me mbajt Crypto Talk, me fol për Blockchain Teknologjitë, kemi pas edhe Besartin prej Crossplag platformës, e cila identifikon plagjiaturën, në fakt bën identifikimin e inteligjencës artificiale, e cila është një formë e plagjiaturës.”
“Është një kompani që vepron prej Kosovës, edhe kemi bisedu për inteligjencën artificiale për trendet e së ardhmes, edhe qysh mundemi me i përdor ato trende pozitivisht në shoqninë tonë. Qendra Studentore i ka disa prej proceseve të digjitalizume por ka nevojë për shumë më shumë digjitalizim”, tha Kiçmari.
Ilir Kiçmari, që para 3 viteve u zgjodh ambasador i ri evropian krahas studimeve, punës, dhe aktiviteteve tjera në Qendrën Studentore, kontributin e tij e ka shtrirë edhe më tej, duke u bërë pjesë edhe e organizatave tjera, siç është edhe Young European Ambasadors.
Ai, me angazhimin e tij është fokusuar tek integrimi evropian dhe përfshirja e të rinjve në aktivitete që përmirësojnë vendin, qoftë në aspektin kulturor apo arsimor. Ndërsa, studimet dhe puna nuk janë fare pengesë për aktivitetet e shumta të tij vullnetare, ai inkurajon aktivizimin edhe të shumë të rinjve dhe studentëve tjerë, pasi konsideron se kjo është mënyrë e mirë për t’i vënë në praktikë edhe njohuritë
studimore.
“Unë kam qenë bursist edhe jam prapë tash edhe në Bachelor edhe në Master, dhe me mësu nuk të pengon aspak nëse merresh me vullnetarizëm, nëse kontribuon për komunitet. Përkundrazi, vullnetarizmi të ndihmon në mësime, për shkak se ti ndihesh më mirë, ndihesh i plotësum edhe shpesh herë mëson diçka që shërben edhe në studime, se e kupton më mirë sensin e ndërlidhjes së shkencës me praktikën edhe mendoj se është diçka e jashtëzakonshme në qoftë se mundesh me pa këtë gjë përmes vullnetarizmit, se pastaj edhe kontributi yt në shoqri ka me qenë më i madh edhe nuk
ka me mbet vetëm në letër apo vetëm si ide, po ka me u realizu edhe me u kthy në kontribut për komunitetin.”
“Prandaj i ftoj të gjithë studentët edhe të shkëlqyeshëm, sepse ekziston një mit që vetëm studentët që nuk janë të shkëlqyeshëm merren me aktivizëm studentor, kjo ështëe pavërtetë sepse mendoj që unë edhe anëtarët e tjerë të ekipit tonë të cilët shumica janë bursista edhe janë të shkëlqyeshëm në studime, jemi dëshmia më e mirë që ky mit nuk vlen edhe është i pavërtetë, edhe i ftoj edhe gjithë studentët e shkëlqyeshëm me u angazhu”, tha ai.
Derisa në Kosovë vazhdojnë fushatat vetëdijesuese rreth rëndësisë së digjitalizimit, Kiçmari, vazhdon me projekte të cilat jetësojnë idetë e një bote teknologjike.
“Planet e ardhme për momentin i kemi për vitin 2024, e kemi javën e shkencës e cila mbahet tash e dy vite, tani viti i tretë, është një javë plotë me aktivitete, aktivizëm, ku reklamohet ideja që duhet me studiu edhe që shkenca është shumë e rëndësishme, përveç kësaj e kemi edhe Prishtina Youth Project. Është një iniciativë që rrjedh prej Helsinkut, në Finlandë, edhe pastaj ka vazhdu në Stamboll, në Turqi, ku ka pas shumë sukses, e cila i bën bashkë të gjitha shtetet prej krejt botës, ku diskutojnë për tema specifike që mundet me qenë inteligjenca artificiale, ose mundet me qenë shkenca e të
dhënave”
“Përveç kësaj e ka edhe idenë e promovimit të dukurive natyrore, kulturore edhe gjithçka të mirë që ne kemi në Kosovë. Ne e kemi shkruar dokumentin edhe projektin për realizimin e Prishtina Youth Project, tash vetëm jemi në fazën e realizimit edhe koordinimit me donatorë të ndryshëm, nëse dikush dëshiron të kontribuojë në këtë aspekt”, potencoi Kiçmari.
Sa i përket aktiviteteve të tij në Qendrën e Studentëve, së fundmi në kuadër të organizatës SIN68, ai ka nisur edhe kursin e vallëzimit për studentë, duke shndërruar një dhomë të pashfrytëzueshme në njërën nga këndet e gjalla të aktivizmit të tij. I nxitur nga pasioni dhe njohuritë e tij për vallëzimin, me anë të këtij kursi, ai ka thyer edhe një stereotip gjinor, ku supozohet se djemtë nuk din apo nuk duhet të vallëzojnë.
“Interesimi ka qenë i jashtëzakonshëm, por vlen me potencu që interesimi në kurs ka qenë më i madh i grave të reja, sesa i burrave të rinj, të cilët një numër i madh i studenteve kanë apliku, kurse studentë (djem) i kemi pasë dy ose tri aplikime, të cilët i kemi ftu, tash janë pjesë, por e njëjta ka ndodhur edhe në kurs të vallëzimit kur kam qenë unë, dmth, në numër i vogël i djemve janë bashku, kurse pjesa tjetër kanë qenë vajza”, përfundoi Iliri.
Përvoja e tij e punës dhe pjesëmarrja në trajnime të shumta, shkolla verore, debate, aktivitete kulturore e të tjera, kanë formuar dëshirën e tij për të përmirësuar komunitetin ku jeton, me objektivin e vetëm për ta shndërruar komunitetin në një “unazë me shumë ngjyra” pa diskriminim dhe me mundësi të reja.
Aktivistët si Iliri ndihmojnë në krijimin marrëdhënieve më të mira mes brezave të rinj, dhe në kapërcimin e ngërçeve që mund të kolapsojnë shoqërinë mes një tranzicioni drejt integrimit të përgjithshëm arsimor, kulturor, artistik e më gjerë. /Katror.info
Edicionin #32 të plotë e gjeni KËTU 🙂
Përgatiti:
