A kanë ndikuar subvencionet qeveritare për pajisjet ngrohëse në nivelin e konsumit të energjisë elektrike? Përdorimi i pajisjeve efiçiente për ngrohje gjatë dimrit e ftohje gjatë verës, po konsiderohet si i nevojshëm për të kursyer energjinë elektrike.
Për këtë, qeveria ka subvencionuar me mijëra familje në vitet e fundit për blerjen e pajisjeve efiçiente.
Nga instituti “Atlas”, thonë se këto subvencione kanë ndikuar që mos të rritet konsumi i energjisë elektrike gjatë verës. Ndërsa, për rëndësinë e përdorimit të pajisjeve efiçiente për RTK-në kanë folur edhe njohës të kësaj fushe.
Mundesh me e lexu edhe…
“Sigurisht që ka ndikuar për faktin që shumë qytetarë të Republikës së Kosovës janë ngrohur pothuajse me energji elektrike në kohën kur kanë aplikuar për subvencionim dhe kjo ka ndikuar jashtëzakonisht edhe në efiçencë dhe njëkohësisht edhe në mbrojtjen e ambientit sepse, siç dihet, shumica e qytetarëve janë ngrohur me pajisje të vjetruara apo dru dhe thëngjill, e kjo ka ndikuar edhe në ambient”, tha Lulzim Beqiri, njohës i çështjeve ekonomike.
Mirëpo, sipas njohësit të energjetikës, Adhurim Haxhimusa, subvencionimi i ka shtyrë shumë familje që të blejnë kondicionerë e pajisje të tjera. Për këtë, ai thotë se gjatë dimrit konsumi i energjisë elektrike rritet.
“Në të dhënat e agregume të konsumit të energjisë elektrike vërehet që korriku i vitit 2025 në raport me 2023, konsumi ka qenë diku për 8 përqind më i lartë se në 2025-tën, çka nënkupton se ne i kemi përdor pajisjet edhe për ftohje gjatë verës, ndërsa gjatë dimrit kemi rritje të konsumit të energjisë elektrike, nëse marrim janarin e 2025 në raport me atë të 2023-tës kemi diku mbi 13 përqind konsum më të lartë të energjisë elektrike”, tha ai.
Beqiri e Haxhimusa thonë se Kosova duhet të punojë në politika të cilat do të ndikonin në ngritjen e kapaciteteve gjeneruese.
“Duke marrë për bazë të gjitha Qeveritë deri më tani, nuk kanë pasur një strategji adekuate sepse pothuajse sillemi me rreth 800MW energji elektrike që prodhojmë. Nuk ka ndonjë shtim të prodhimit. Kishim një fat të mirë që e refuzuam Kosovën e Re dhe tashmë do të duhej një strategji më efikase, duke u bazuar edhe në direktiva të BE -së, njëkohësisht edhe në planin e zhvillimit për prodhimin e energjisë elektrike”, ka thënë Beqiri.
“Qeveria për momentin nuk ka politikë të gatshme, nuk ka bërë politika, nuk ka krijuar korniza ashtu që të kemi përmirësim të gjendjes dhe në dimrin që po hyjmë ndoshta ta kalojmë më mirë me furnizim më të qëndrueshëm të energjisë elektrike”, thotë Haxhimusa.
Sipas njohësve të fushës, Kosova ka resurse të bollshme, por pa një strategji zhvillimore të qartë dhe pa ndjekur direktivat e Bashkimit Evropian, qytetarët rrezikojnë të vazhdojnë të përballen me mungesë të energjisë edhe në shekullin 21./Katror.info
