Twitter (tani X) është detyruar të paguajë një gjobë rekord prej mbi 550 mijë eurosh për një ish-punonjës të lartë në selinë në Irlandë, pasi u zbulua se ishte shkarkuar padrejtësisht kur ai nuk iu përgjigj një emaili të Elon Musk.
Kur Musk pagoi 44 miliardë dollarë në tetor 2022 për platformën sociale, të cilën e quajti X më pas, Gary Rooney ishte drejtor i një prej departamenteve në zyrën në Dublin.
Miliarderi i dërgoi stafit një mesazh duke nënvizuar vizionin e tij për biznesin, raporton The Guardian.
“Për të krijuar një depërtim në Twitter 2.0 dhe për të pasur sukses në një botë gjithnjë më konkurruese, do të duhet të jemi jashtëzakonisht të fortë. Kjo nënkupton punën për orë të gjata në intensitet të lartë. Vetëm performanca e jashtëzakonshme do të përbëjë një notë kaluese”, shkroi Musk.
Në këtë mesazh Musk kishte shkruar se nëse dëshironin të ishin pjesë e këtij Twitteri të ri, duhet të klikonin “po” në një link bashkëngjitur, duke shtuar se ata që nuk klikonin në të do të largoheshin me një pagesë tre-mujore.
Komisioni për Marrëdhënie Pune i Irlandës dëgjoi se Rooney nuk kishte klikuar “po”.
Tri ditë më vonë, ai kishte marrë një email tjetër për t’u pajtuar me vendimin për dorëheqje.
Rooney ishte me kompaninë që në vitin 2013. Ai në një email tjetër kishte thënë se në asnjë moment nuk kishte dhënë indikacione se po jepte dorëheqje.
Shuma totale për shkarkimin e padrejtë prej 550,131 euro u dha bazuar nga pagesa e humbur për Rooneyn prej 350,131 eurosh nga janari 2023 deri në maj 2024, dhe pagesa e vlerësuar e humbur në të ardhmen prej 200,000 eurosh./Katror.info
