Japonia ka vendosur një rekord të ri botëror për shpejtësinë e internetit, duke arritur 1.02 petabit për sekondë, sipas Institutit Kombëtar të Teknologjisë së Informacionit dhe Komunikimit (NICT) të vendit.
Kjo është mjaftueshëm e shpejtë për të shkarkuar të gjithë bibliotekën e Netflix ose versionin në anglisht të Wikipedia mijëra herë në vetëm një sekondë.
Për krahasim, kjo shpejtësi e re është 16 milionë herë më e shpejtë se shpejtësia mesatare e internetit në Indi prej rreth 63.55 Mbps dhe 3.5 milionë herë më e shpejtë se shpejtësia mesatare e internetit në Shtetet e Bashkuara, bazuar në të dhënat aktuale.
Mundesh me e lexu edhe…
“Qëllimi ynë ishte të tregonim se interneti me shpejtësi jashtëzakonisht të lartë mund të arrihet në distanca të gjata duke përdorur infrastrukturën aktuale”, tha NICT në një deklaratë.
Arritja u bë nga Laboratori i Rrjetit Fotonik i NICT-së, në partneritet me Sumitomo Electric dhe studiues në Evropë. Ata arritën të dërgonin të dhëna në 1 mijë e 808 kilometra duke përdorur një kabllo të veçantë me fibra optike me 19 bërthama. Këto kabllo janë të së njëjtës madhësi, vetëm 0.125 mm të trasha si ato që përdoren aktualisht në infrastrukturën e internetit.
Në eksperiment, studiuesit dërguan sinjale përmes 19 sytheve, secila me gjatësi 86.1 km, duke e përsëritur udhëtimin 21 herë. Në total, sinjalet udhëtuan 1,808 km dhe bartën 180 rrjedha të dhënash të ndara.
Sasia totale e të dhënave të transferuara për sekondë për kilometër arriti në 1.86 ekzabitë, vlera më e lartë e regjistruar ndonjëherë.
Vetë kablli me fibra u zhvillua nga Sumitomo Electric, ndërsa NICT ndërtoi sistemin e transmetimit. Ekipi përdori transmetues, marrës dhe pajisje të tjera të përparuara për të arritur këtë rezultat.
Me këtë shpejtësi, vlerësohet se dikush mund të shkarkojë të gjithë Wikipedia-n në gjuhën angleze rreth 100 GB 10 mijë herë në sekondë, sipas faqes së teknologjisë Gagadget. Shpejtësia gjithashtu do t’u lejonte përdoruesve të shkarkonin menjëherë skedarë video me rezolucion të lartë 8K.
“Ky test tregon se interneti ultra i shpejtë është i mundur pa pasur nevojë të zëvendësohet infrastruktura aktuale kabllore”, tha NICT.
Zbulimi i madh mund të ndihmojë në përmbushjen e kërkesës në rritje për internet me shpejtësi të lartë në të gjithë globin, veçanërisht pasi gjithnjë e më shumë njerëz përdorin aplikacione të të dhënave në shkallë të gjerë si transmetimi i videos, ruajtja në cloud dhe inteligjenca artificiale.
NICT nuk ka njoftuar se kur ose nëse kjo teknologji do të vihet në përdorim publik, por rezultati tregon se çfarë është e mundur me përparimet në sistemet me fibra optike./Albanian Post/Katror.info
