Presidenti i SHBA-së Joe Biden në një deklaratë të dielën tha se ish presidenti amerikan Jimmy Carter “qëndron si një model i asaj që do të thotë të jetosh një jetë me kuptim dhe qëllim, një jetë me parime, besim dhe përulësi. Jeta e tij ishte e përkushtuar ndaj të tjerëve.”
Deklarata e Biden është në mesin e shumë ngushëllimeve nga miq, politikanë, anëtarë të familjes e liderë botërorë që i kanë bërë homazhe ish-presidentit amerikan Jimmy Carter, i cili vdiq në moshën 100-vjeçare. Fituesi i çmimit Nobel për Paqe vdiq në shtëpinë e tij në Plains, Georgia.
Jimmy Carter, një fermer kikiriku nga Plains, Georgia, që shërbeu në Marinën e SHBA-ve, ishte president nga viti 1977 deri në 1981.
Mundesh me e lexu edhe…
Duke vendosur të drejtat e njeriut në qendër të politikës së jashtme të SHBA-ve, Carter arriti të ndërmjetësojë një traktat paqeje ende në fuqi midis Egjiptit dhe Izraelit. Ai gjithashtu themeloi Departamentin e Energjisë në vitin 1977, shkruan CNN, përcjell Katror.info.
Menjëherë pas presidencës, Carter dhe bashkëshortja e tij, Rosalynn, themeluan “Qendrën Carter”, e cila ka monitoruar zgjedhjet ndërkombëtare dhe ka promovuar shëndetin publik në mbarë botën.
Boze Godwin, një ish-kryetar bashkie i Plains, Georgia, dhe një mik i vjetër i Jimmy Carter-it, i cili e kishte njohur ish-presidentin që kur Godwin ishte 10 vjeç, e përshkroi mikun e tij të ndjerë si “një person që kurrë nuk harroi njerëzit këtu, pavarësisht se çfarë pozite mbante.”
Duke folur me Anderson Cooper të CNN-it të dielën mbrëma, Godwin e kujtoi Carter-in si “një person shumë të ndershëm, shumë të drejtpërdrejtë dhe jashtëzakonisht punëtor” që ndihej si pjesë e komunitetit dhe “thjesht si një prej nesh” pasi ai dhe Rosalynn Carter u rikthyen në qytetin e tyre të lindjes, Plains, pas mandatit presidencial.
“Ai do të varroset këtu, dhe kjo është një lëvizje e qëllimshme për të mbajtur njerëzit të kthehen për vizitë,” tha Godwin. “Edhe pas vdekjes, ai nuk e ka harruar qytetin.”
Joe dhe Jill Biden
Presidenti aktual amerikan, Joe Biden dhe zonja e parë, Jill Biden e quajtën atë “një lider të jashtëzakonshëm, burrë shteti dhe humanitar”.
“Mbi gjashtë dekada, ne patëm nderin ta quajmë Jimmy Carter një mik të dashur. Por, ajo që është e jashtëzakonshme për Jimmy Carter, është se miliona njerëz në të gjithë Amerikën dhe në botë që nuk e takuan kurrë, menduan për të edhe si një mik të dashur.
Me dhembshurinë dhe qartësinë e tij morale, ai punoi për të zhdukur sëmundjet, për të krijuar paqen, për të avancuar të drejtat civile dhe të drejtat e njeriut, për të promovuar zgjedhje të lira dhe të ndershme, për të strehuar të pastrehët. Ai shpëtoi, ngriti dhe ndryshoi jetët e njerëzve në mbarë globin.”
Donald Trump
“Melania dhe unë po mendojmë ngrohtësisht për familjen Carter dhe të dashurit e tyre gjatë kësaj kohe të vështirë. Ne i bëjmë thirrje të gjithëve t’i mbajnë ata në zemrat dhe lutjet e tyre.”, shkroi Trump.
Bill dhe Hillary Clinton
Ish-presidenti Bill Clinton, i cili punoi me Jimmy Carter pasi u largua nga Shtëpia e Bardhë, dhe sekretarja Hillary Clinton thanë se ai “jetoi për t’u shërbyer të tjerëve deri në fund”.
“Nga angazhimi i tij për të drejtat civile si senator shtetëror dhe guvernator i Georgias; në përpjekjet e tij si President për të siguruar paqen midis Egjiptit dhe Izraelit në Camp David; në përpjekjet e tij post-presidenciale në Qendrën Carter për të mbështetur zgjedhjet e ndershme, duke avancuar paqen, luftimin e sëmundjeve dhe promovimin e demokracisë…ai punoi pa u lodhur për një botë më të mirë dhe më të drejtë”, thanë ata në një deklaratë.
George W Bush
George W Bush e përshkruan Carterin si “një njeri me bindje të thella”.
“Ai ishte besnik ndaj familjes, komunitetit dhe vendit të tij. Presidenti Carter e nderoi zyrën. Dhe përpjekjet e tij për të lënë pas një botë më të mirë nuk përfunduan me presidencën. Puna e tij me Habitat for Humanity dhe Qendrën Carter dha një shembull shërbimi që do të frymëzojë amerikanët për breza.”
Djali i tij Chip Carter
Djali i tij, Chip Carter, tha: “Babai im ishte një hero, jo vetëm për mua, por për të gjithë ata që besojnë në paqen, të drejtat e njeriut dhe dashurinë altruiste. Vëllezërit, motra dhe unë e ndamë atë me pjesën tjetër të botës përmes këtyre besimeve të përbashkëta. Bota është familja jonë për shkak të mënyrës se si ai i bashkoi njerëzit dhe ne ju falënderojmë që nderuat kujtimin e tij duke vazhduar të jetoni këto besime të përbashkëta.”/Katror.info
Përgatiti:
