Kompania për Distribuimin e Energjisë Elektrike në Kosovë (KEDS) ka njoftuar blerjen e tetë gjeneratorëve mobilë, secili me kapacitet prej 100 kVA, të cilët do të përdoren në situata emergjente për të siguruar furnizim të pandërprerë me energji elektrike për konsumatorët më të ndjeshëm në vend, shkruan Katror.info.
Sipas KEDS-it, këta gjeneratorë do të shërbejnë si burim rezervë për institucione kyçe si spitalet, institucionet e sigurisë, qendrat e kontrollit emergjent dhe objekte të tjera kritike për funksionimin e shtetit.
Gjeneratorët do të jenë në gatishmëri të përhershme dhe do të shpërndahen në mënyrë strategjike në të gjitha rajonet e Kosovës, me qëllim garantimin e një reagimi të shpejtë dhe efikas në rast të ndërprerjeve të papritura të energjisë.
Mundesh me e lexu edhe…
“Ky investim është pjesë e angazhimit tonë për të përmirësuar sigurinë energjetike dhe për të mbështetur funksionimin pa ndërprerje të institucioneve vitale për vendin,” thuhet në njoftimin e KEDS-it./Katror.info
