Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur me nderime të larta ushtarake në një vizitë zyrtare Shefin e Mbrojtjes së Gjermanisë, Gjeneral Carsten Breuer, shkruan Katror.info.
Gjatë takimit, Gjeneral Jashari e informoi homologun e tij për zhvillimet më të fundit brenda FSK-së, për arritjet dhe përkushtimin e saj ndaj ndërtimit të kapaciteteve moderne dhe të afta për të kontribuar në sigurinë dhe stabilitetin në Kosovë dhe rajon. Ai theksoi fushat e bashkëpunimit tashmë ekzistues me Bundeswehr-in dhe nevojën për thellimin e mëtejshëm të këtij partneriteti.
Gjenerali gjerman Carsten Breuer përgëzoi FSK-në për profesionalizmin dhe progresin e arritur, duke vlerësuar lart rolin e saj si një forcë stabile dhe kontribuuese në sigurinë rajonale. Ai konfirmoi gatishmërinë e Gjermanisë për të vazhduar mbështetjen ndaj FSK-së në fusha kyçe si trajnimi, edukimi ushtarak dhe bashkëpunimi operacional.
Mundesh me e lexu edhe…
Në qendër të diskutimeve ishin mundësitë për trajnime dhe ushtrime të përbashkëta, shkëmbimi i përvojave në kuadër të institucioneve ushtarake gjermane, si dhe analiza e situatës së sigurisë në Kosovë dhe rajon. Të dy gjeneralët ndanë qëndrime të përbashkëta mbi rëndësinë e bashkëpunimit ndërkombëtar për ruajtjen e paqes dhe stabilitetit në Ballkanin Perëndimor.
Vizita e Gjeneral Breuer vlerësohet si një moment i rëndësishëm në forcimin e partneritetit strategjik ndërmjet Kosovës dhe Gjermanisë, si dhe në mbështetjen e vazhdueshme për zhvillimin dhe profesionalizimin e mëtejshëm të FSK-së./Katror.info
