Tregu i Gjelbër, dikur një organizatë fitimprurëse, sot ndodhet në një gjendje të mjerueshme. Që nga viti 2014, tregu ka kaluar nën administrimin e Agjencisë Kosovare të Privatizimit (AKP), e cila nuk ka ndërmarrë asnjë hap për mirëmbajtjen e tij apo të tri tregjeve që ndodhen në kryeqytet. Mirëmbajtja faktike është kryer nga Komuna e Prishtinës, por as AKP dhe as institucionet lokale nuk kanë realizuar ndonjë projekt konkret për përmirësimin e kushteve të tregtarëve dhe konsumatorëve.
Gjendja në treg mbetet e pandryshuar, me mungesë infrastrukture dhe kushte të papërshtatshme për tregtarët dhe konsumatorët. Hapësira e tregut është e mbuluar me mbeturina, ndërsa tregtarët kanë improvizuar mbulesa për të mbrojtur produktet e tyre. Konsumatorët shprehin pakënaqësi për mungesën e higjienës dhe kushteve të tregtimit.
Nga AKP kanë konfirmuar se tregu është në proces likuidimi dhe menaxhohet nga Ndërmarrja Shoqërore “Tregu”, ndërsa për mirëmbajtjen e tij kujdeset Ndërmarrja Publike Banesore.
Ndërkohë, Komuna e Prishtinës ka pranuar vonesat në përmirësimin e situatës dhe ka njoftuar se tenderi për rindërtimin e tregut do të shpallet në muajin prill.
“Shpresojmë shumë se të gjitha përgatitjet janë gati që gjatë muajit prill të shpallet tenderi dhe nëse gjithçka ecën sipas afateve dhe ligjit të prokurimit, atëherë shpejt do të shpallim fituesin dhe brenda kësaj kohe të mandatit t’i përfundojmë ndërhyrjet edhe në atë pjesë. Kjo është një lajm i mirë për tregtarët e Prishtinës, sepse gjendja e tyre nuk është e mirë dhe këtë duhet pranuar. Jemi vonuar dhe kemi një pjesë të përgjegjësisë edhe ne,” tha Donat Lushaku, zëdhënës i Komunës së Prishtinës.
Tregtarët dhe qytetarët kanë shprehur zhgënjimin e tyre për mungesën e investimeve dhe vëmendjes institucionale ndaj këtij tregu.
“Ne i paguajmë të gjitha detyrimet ndaj AKP-së, por ajo nuk investon asgjë. Nëse vonohemi me pagesa, na kërcënojnë me përmbarues,” u shpreh tregtari Shaban Bislimi. Ai shtoi se tregtarët paguajnë nga 40 deri në 45 euro në muaj për një stendë me përmasa 2m x 1m.
Një tjetër tregtar, Kadri Sfarqa, tha se renovimet i kanë bërë me mundësitë e tyre, por institucionet lokale duhet të ndërhyjnë për të përmirësuar gjendjen.
Konsumatorët gjithashtu ndajnë të njëjtën pakënaqësi për kushtet në treg.
“Si pazar është i parregullt, nuk ka asnjë kusht të krijuar për tregtarët. Është turp dhe gjynah që ky treg është lënë në këtë gjendje. Këtu është sofra e qytetarëve të Prishtinës, ndoshta edhe më gjerë. Nuk e di pse asnjë kryetar nuk ka pasur guximin ta rregullojë këtë vend,” tha konsumatori Fatmir Makolli.
Edhe konsumatori Enver Latifi kritikoi mungesën e hapësirave të parkimit dhe kushtet e tregut, duke e cilësuar atë si “tregun më të shëmtuar”. Ndërsa Turkan Zaimi propozoi që tregu të zhvendoset në hapësirën ku më parë ndodhej Agjencia Kosovare e Mirëbesimit (AKM).
Sipas komunës, pas shpalljes së tenderit, tregu do të rilokohet përkohësisht në një hapësirë tjetër deri në përfundimin e rindërtimit./Katror.info
Përgatiti:
