Federata e Pingpongut e Kosovës ka njoftuar se përgatitjet për dy prej garave më të mëdha ndërkombëtare të pingpongut, WTT Youth Contender (29 maj – 1 qershor) dhe WTT Feeder Prishtina (3 – 7 qershor), janë drejt përfundimit, shkruan Katror.info.
Salla e madhe sportive në Pallatin e Rinisë në Prishtinë tashmë është duke marrë pamjen përfundimtare, duke u përshtatur plotësisht me standardet e larta të organizatës botërore World Table Tennis (WTT).
Mysafirët e parë nga Koreja e Jugut dhe Japonia tashmë kanë arritur në Kosovë, ndërsa mbikëqyrësja e WTT-së, Nikoleta Stefanova, po qëndron në vend për të mbikëqyrur nga afër organizimin dhe për të koordinuar përgatitjet finale.
Mundesh me e lexu edhe…
Sipas Federatës, ky super event pritet të sjellë në Prishtinë mbi 600 sportistë nga 45 shtete të ndryshme, duke përfshirë edhe 12 vende që ende nuk e kanë njohur pavarësinë e Kosovës. Kjo paraqet jo vetëm një moment historik për sportin vendor, por edhe një mundësi të veçantë për afirmim ndërkombëtar dhe diplomaci sportive.
Me këtë organizim, Kosova po konfirmon gjithnjë e më shumë rolin e saj në hartën ndërkombëtare të sporteve dhe gatishmërinë për të pritur ngjarje të nivelit të lartë. Të gjitha përgatitjet po zhvillohen me kujdes të madh, duke synuar që ky të jetë një prej organizimeve më të suksesshme të sportit të pingpongut në vend./Katror.info
