Agjencia e Ushqimit dhe Veterinarisë ka ndaluar importin e mishit të pulës dhe produkteve të tjera të shpendëve të cilat vijnë nga Brazili për në Kosovë.
AUV ka njoftuar se ky vendim është marrë për shkak të shpërthimit të gripit të shpendëve (H5N1) në një fermë komerciale në shtetin Rio Grande të Brazilit i cili është konfirmuar më 16.05.2025 nga autoritetet braziliane.
Vendimi për ndalimin e importit të mishit dhe produkteve të shpendëve nga Brazili synon të mbrojë shëndetin publik dhe të parandalojë përhapjen e mundshme të sëmundjes në territorin e Kosovës.
Mundesh me e lexu edhe…
“Ky vendim është në përputhje me praktikat ndërkombëtare dhe veprimet e ndërmarra nga vende të tjera, përfshirë Bashkimin Evropian, Kinën, dhe vende tjera të cilat kanë pezulluar importet e mishit të pulës nga Brazili pas konfirmimit të shpërthimit. Gripi i shpendëve është një sëmundje virale shumë ngjitëse që prek shpendët dhe, në raste të rralla, mund të transmetohet edhe te njerëzit. Megjithëse nuk ka prova që konsumimi i mishit apo vezëve të shpendëve mund të shkaktojë infeksion, mirëpo ndalimi i importit është një masë paraprake për të garantuar sigurinë ushqimore të qytetarëve”- thuhet në njoftimin e AUV.
Vendimi do të mbetet në fuqi deri në një njoftim të dytë, ka bërë të ditur Agjencia e Ushqimit dhe Veterinarisë./Katror.info
