Në prag të Ditës Botërore kundër Duhanit, Ministria e Shëndetësisë në bashkëpunim me Institutin Kombëtar të Shëndetit Publik të Kosovës (IKSHPK) organizoi një konferencë për media, ku u diskutuan sfidat dhe përpjekjet institucionale për reduktimin e duhanpirjes në vend.
Në këtë konferencë morën pjesë ministri në detyrë i Shëndetësisë, Arben Vitia, përfaqësues nga IKSHPK si dhe nga Koalicioni për Arsim dhe Avokim për Kontrollin e Duhanit (KADAC).
Ministri Vitia theksoi se duhani mbetet një nga kërcënimet më të mëdha për shëndetin publik, duke theksuar se çdo vit mbi 8 milionë njerëz humbin jetën si pasojë e konsumimit të tij. Ai njoftoi se në Kosovë ka pasur një rënie të përdorimit të duhanit që nga viti 2011, dhe se janë ndërmarrë një sërë masash konkrete për të ndikuar në uljen e konsumit. Ndër to përmendi rritjen e akcizës për produktet e duhanit, rritjen e inspektimeve dhe angazhimin për shtimin e numrit të inspektorëve që do të ndihmojnë në zbatimin më efikas të ligjit për ndalimin e duhanpirjes në hapësirat e mbyllura.
Mundesh me e lexu edhe…
Sipas të dhënave nga IKSHPK, një pjesë e konsiderueshme e popullsisë në Kosovë, përfshirë edhe të rinjtë, vazhdon të jetë e ekspozuar ndaj përdorimit të duhanit. Faik Hoti nga IKSHPK tha se janë duke u zhvilluar aktivitete të shumta dhe hulumtime të reja, me fokus të veçantë në të rinjtë, me qëllim të uljes së përhapjes së këtij fenomeni.
Hoti shtoi se që nga hyrja në fuqi e ligjit për kontrollin e duhanit në vitin 2013, hulumtimet e IKSHPK-së kanë treguar një rënie të konsumit, por përballja me sfidat në zbatimin e ligjit, sidomos në ambientet ku ndalohet duhanpirja, vazhdon të mbetet një shqetësim serioz.
Dita Botërore kundër Duhanit shënohet çdo vit më 31 maj dhe ka për qëllim të rrisë ndërgjegjësimin për rreziqet që sjell konsumimi i duhanit dhe nevojën për politika të forta për ta luftuar atë. Këtë vit, fushata globale e Organizatës Botërore të Shëndetësisë fokusohet në ekspozimin e taktikave mashtruese të industrisë së duhanit dhe mbrojtjen e brezave të rinj nga varësia ndaj nikotinës./Katror.info
