Organizata joqeveritare Kosova – Women 4 Women ka hapur thirrjen për ofertim për furnizimin me pajisje rrobaqepësie, që do t’i shpërndahen përfituesve të projektit “Mundësitë e Përmirësuara të Vetëpunësimit dhe Punësimit”, i financuar nga Agjencia Austriake për Zhvillim, shkruan Katror.info.
Pajisjet që përfshihen në këtë tender do të shërbejnë për fuqizimin ekonomik të grave përmes mbështetjes në krijimin e bizneseve të vogla apo përfshirjes në tregun e punës. Thirrja është e hapur për të gjitha kompanitë që ofrojnë inpute profesionale për rrobaqepësi, si makina qepëse industriale dhe shtëpiake, pajisje për hekurosje, kukulla modelimi, prerëse elektrike dhe mjete të tjera të domosdoshme për këtë veprimtari.
Ofertat duhet të dorëzohen me dokumentacion të plotë dhe të nënshkruar në adresën elektronike [email protected], më së voni deri më 8 gusht 2025. Dokumentet e kërkuara përfshijnë certifikatën e regjistrimit të biznesit, dëshminë për mungesë të detyrimeve tatimore dhe referenca nga bashkëpunime të mëparshme.
Mundesh me e lexu edhe…
Kosova – Women 4 Women njofton se aplikimet e dorëzuara pas afatit nuk do të merren në konsideratë, ndërsa për çdo sqarim shtesë, kompanitë mund të kontaktojnë në të njëjtën adresë.
Me këtë iniciativë, organizata vazhdon misionin e saj për të fuqizuar gratë më të margjinalizuara në Kosovë, duke u mundësuar të fitojnë dhe kursejnë të ardhura, të përmirësojnë mirëqenien, të marrin rol më aktiv në vendimmarrje dhe të ndërtojnë një të ardhme më të qëndrueshme për veten dhe komunitetin./Katror.info.
