Është çështje krenarie kombëtare, me ekipe të përzgjedhura me kujdes që kalojnë vite të tëra duke u stërvitur për të fituar nderin më të lartë në fushën e tyre dhe për të përfaqësuar vendin në skenën ndërkombëtare.
Jo, nuk bëhet fjalë për Kupën e Botës në futboll. Është Kupa e Botës në Pastiçeri! Ky event dyvjeçar mbledh konkurrentë nga vende si Egjipti, Mauritius dhe Koreja e Jugut në një garë të ëmbël ku ekipet krijojnë ëmbëlsira të jashtëzakonshme dhe unike, shkruan CNN, transmeton Katror.info.
Edicioni i këtij viti u mbajt më 20 dhe 21 janar. Çdo ekip përbëhej nga tre anëtarë, secili specialist në çokollatë, akull dhe sheqer.
Mundesh me e lexu edhe…
Ata kishin për detyrë të krijonin tre ëmbëlsira që përfaqësonin vendin e tyre: një ëmbëlsirë të ngrirë, një ëmbëlsirë restoranti – e cila mund të kishte një zbukurim special të shtuar gjatë gjykimit – dhe një shfaqje artistike me çokollatë.
Dhe të gjitha këto duhej të realizoheshin brenda pesë orëve!
Pastiçierët përdorën përbërës dhe dizajne që theksonin shijet kulinare dhe traditat e vendeve të tyre. Ekipi nga Kina krijoi një dragua të ndërlikuar prej sheqeri, ndërsa konkurrentët nga Meksika përdorën çokollatë, misër dhe përbërës të tjerë vendas në ëmbëlsirat e tyre.
Përveçse përfaqësuan vendet e tyre me shije dhe dizajn, konkurrentët shfaqën edhe kostume dhe aksesorë tematikë.
Ekipi i Francës mbante bluza me vija Breton dhe bereta elegante, pastiçierët nga Meksika mbanin maska të frymëzuara nga Dita e të Vdekurve, ndërsa ekipi i Mbretërisë së Bashkuar punoi me kapela dhe papione klasike.
Fituesit e edicionit 2025 Pavarësisht se gara u mbajt në Lion të Francës, ekipi francez nuk arriti të fitonte medaljen e artë, duke u renditur në vendin e dytë.
Triumfin e mori Japonia, kampionia e rikthyer, e cila impresionoi me një ëmbëlsirë restoranti të quajtur granita me limon, dardhë, marigold dhe çokollatë në formën e një gjetheje Asanoha (kërpi).
Për ëmbëlsirën e ngrirë, ekipi krijoi një delikatesë me kajsi, që dukej si një lodër tradicionale japoneze. “Kemi përfshirë historinë dhe kulturën e Japonisë në dizajnin tonë. Arritëm të bashkojmë shijen dhe modelet tradicionale delikate për të treguar teknikat tona,” tha pastiçieri Masanori Hata, eksperti i çokollatës në ekipin japonez.
“Nuk e mbaj mend momentin kur fituam. Ishte kaq e papritur dhe e pabesueshme. Japonia u njoh si kampione për dy edicione radhazi. Jam i lumtur dhe krenar,” shtoi ai.
Ndërkohë, ekipi francez krijoi një koleksion vezësh artistike me çokollatë, të mbushura me mousse çokollatë-lajthi, të lyer me gjalpë të aromatizuar me agrume dhe vanilje, dhe të shoqëruara me akullore vanilje të pjekur dhe konfit mandarine.
Medalja e bronztë shkoi për Malajzinë, e cila arriti rezultatin më të mirë ndonjëherë në këtë garë.
Ekipi malajzian shkëlqeu me ëmbëlsirën e tyre të ngrirë, të përshkruar si “një kombinim harmonik i agrumeve të freskëta, kajsive të ëmbla dhe erëzave delikate,” duke reflektuar trashëgiminë multikulturore të vendit.
Klasifikimi përfundimtar i Kupës së Botës në Pastiçeri 2025:
1. Japonia
2. Franca
3. Malajzia
4. Kina
5. Belgjika
6. Italia
7. Koreja e Jugut
8. Singapori
9. Mbretëria e Bashkuar 10. Argjentina
Përgatiti:
