“Ka nisur si hobi dhe tani më është bërë profesion, e dikur stil i jetës. Kam nisur kur nuk ka pasur as trepikësh, as semaforë, as kosh me faul. Kam vazhduar në ligat e një shteti që sot as nuk ekziston, dhe në ligat e një shteti që po e themelonim vetë, pa ditur kur ajo ëndërr do të realizohet. Kam luajtur në beton, në sallat e sporteve, në palestrat e shkollave fillore, kam transmetuar Ligën e Kosovës nga sallat e ftohta me telefon statik për radio. Kam transmetuar NBA-n dhe Lojërat Olimpike” – rrëfen Blerim Vuniqi, ish-basketbollist dhe gazetar sportiv me përvojë të gjatë në Kosovë.
Por kur filloi kampionati i parë i basketbollit në Kosovë? Kush ishin protagonistët dhe si nisi strukturimi i këtij sporti në vend, sipas Blerim Vuniqit?
Kampionati i parë i Kosovës në basketboll është zhvilluar në tetor të vitit 1948, në formë të një turneu ku morën pjesë pesë ekipe: Poljeti dhe Proleteri i Prishtinës, Vëllaznimi dhe Ardhmënia e Pejës, si dhe Metohija e Prizrenit. Poljeti fitoi të gjitha ndeshjet, u shpall kampion dhe ndryshoi emrin në “Kosovo”, për të garuar më pas në Ligën e Serbisë.
Mundesh me e lexu edhe…
Kjo periudhë shënoi edhe fillimin e strukturimit të basketbollit në Kosovë. Në vitin 1949 u themelua Lidhja e Basketbollit e Kosovës me kryetar Sahit Zatriqin dhe sekretar Hazim Tufën – lojtarë e pionierë që hodhën themelet e sportit të basketbollit.
Ky rrëfim vjen në kuadër të dokumentarit “4 Çerekët – Episodi 1”, i cili sjell për herë të parë historinë e basketbollit kosovar. Dokumentari, me autor dhe producent Leart Hoxha dhe intervista të realizuara nga Blerim Vuniqi, është prodhim i Katror Media dhe mbështetet nga Ministria e Kulturës, Rinisë dhe Sportit.
“4 Çerekët” është i strukturuar në katër episode, një ndarje simbolike që pasqyron formatin e një ndeshjeje basketbolli, duke lidhur dramatikën e lojës me historinë reale të sportit në vend./Katror.info
