Me moton “Kancerin e gjirit e mposhtim së bashku”, Ministria e Shëndetësisë lansoi fushatën ndërgjegjësuese në kuadër të Muajit të Ndërgjegjësimit mbi kancerin e gjirit.
Ministri i Shëndetësisë, Arben Vitia tha se kontrollat e hershme dhe mamografitë janë të rëndësishme për parandalim dhe shërim të hershëm.
“Vitin e kaluar filluam me shërbimin e mamografisë falas edhe në pjesën veriore. Rinovuam Klinikën e Ornkologjisë, duke punuar me centralizimin e shërbimeve të Onkologjisë dhe zgjerim të listës së barnave”, tha ai.
“Mbi 50% të grave të diagonstifikuar janë ato që kanë zbuluar me kohë kancerin dhe kjo tregon sa i rëndësishëm është diagnostifikimi dhe kontrollat e rregullta”, shtoi ministri Vitia.
Një nga të mbijetuarat e kancerit të gjirit, e cila është edhe drejtoreshë e Qendrës Kosovare për Luftimin e Kancerit të Gjirit “Jeta/Vita”, Nafije Latifi, ftoi të gjitha gratë dhe vajzat që të kryejnë kontrollet sa më herët.
“Sfida ime filloi para 20 viteve dhe ishte rrëfimi im i parë publik i cili ishte me qëllim ndërgjegjësimi të grave në parandalimin e kësaj semundjeje. Sot është i mundur shërimi pasi sot ka kushte më të mira për diagnostikim dhe trajtim”, ka thënë ajo.
Drejtori i Onkologjisë, Ilir Kurteshi, tregoi për rastet në këtë klinikë. “Në dy vitet e fundit 52% të rasteve janë zbuluar në fazën e parë të kancerit. Investimet e fundit në Klinikë kanë bërë punë të madhe që pacientët të kenë një trajnim dinjitoz”, tha ai.
Muaji tetor, është muaji i ndërgjegjësimit për zbulimin e hershëm të kancerit të gjirit. Kanceri i gjirit është kanceri më i shpeshtë te gratë, po prek edhe burrat. Çdo e 8-ta grua në botë është e rrezikuar nga kanceri i gjirit./Katror.info
Përgatiti:
