Platforma e artit bashkëkohor në botë, “Frieze”, ka renditur “Manifesta 14”, në Prishtinë, në mesin e dhjetë ekspozitave më të mira evropiane të vitit 2022.
Në artikull thuhet se “Frieze”, ka intervistuar artistë dhe shkrimtarë nga Ballkani Perëndimor në lidhje me organizimin e bienales në Kosovë.
“Përpara edicionit të 14-të të Manifesta, i cili u mbajt këtë verë në Prishtinë, “Frieze” mblodhi një grup artistësh dhe shkrimtarësh nga Ballkani Perëndimor për të diskutuar mbi përfitimet dhe organizmin e bienales nomade në Kosovë. Disa pjesëmarrës, duke përfshirë Šejla Kamerić, shpresuan që në qendër të vëmendjes të jenë artistët rajonalë. Dëshira e saj u realizua kur u zbulua se më shumë se gjysma e artistëve ekspozues ishin nga rajoni”, thuhet në artikull.
Mundesh me e lexu edhe…
Tutje, “Frieze” shkruan se pikat kryesore të ‘Manifestas’ përfshinin vizatimet ‘provokuese’ dhe ‘të çuditshme’ të punuara me ngjyra lapsi nga artisti kosovar Artan Hajrullahu, dhe Selma Selman, një artiste nga Bosnjë-Hercegovinë.
“Manifesta 14”, ka sjellë shumë vizitorë të huaj dhe ka bërë që Prishtina të jetë qendër e kulturës e artit.
Ministri i Kulturës, Rinisë dhe Sportit, Hajrulla Çeku, tha se organizimi i Manifestës mblodhi artistët bashkëkohorë nga vendi dhe bota në Prishtinë.
“Ishte kënaqësi të shohim numrin e madh të vizitorëve dhe interesimin për të parë programin artistik që është ofruar përgjatë kësaj periudhe. Lokacionet në hapësira të mbyllura kanë pasur 140 mijë vizita, 612 mijë vizita janë zhvilluar në intervenimet artistike publike, në total 752 mijë vizita në të gjitha lokacionet e bienales deri tani”, ka thënë Çeku.
Tutje, Çeku tha se njohja dhe vëmendja ndërkombëtare që ka marrë Kosova përmes paraqitjes në mediat ndërkombëtare ka ndikuar po ashtu në promovimin dhe imazhin e vendit tonë në botë./Katror.info
Përgatiti:
