Ministri në detyrë i Mbrojtjes së Kosovës, Ejup Maqedonci, priti sot në takim zyrtar Kancelarin Federal dhe Ministrin e Mbrojtjes, Mbrojtjes Civile dhe Sportit të Zvicrës, Martin Pfister, i cili ishte i shoqëruar nga një delegacion zyrtar zviceran, shkruan Katror.info.
Në këtë takim, ministri Maqedonci ishte i shoqëruar nga zëvendësministri Shemsi Syla dhe Sekretari i Përgjithshëm i Ministrisë së Mbrojtjes, Gafurr Dugolli.
Në qendër të diskutimeve ishte thellimi i bashkëpunimit mes Kosovës dhe Zvicrës në fushat e mbrojtjes, mbrojtjes civile dhe edukimit ushtarak. Maqedonci theksoi se diaspora kosovare në Zvicër ka luajtur dhe vazhdon të luajë një rol kyç si urë lidhëse ndërmjet dy vendeve, duke ndikuar pozitivisht në marrëdhëniet bilaterale dhe zhvillimin e Kosovës.
Mundesh me e lexu edhe…
Ministri nënvizoi rëndësinë që ka bashkëpunimi në trajnime dhe edukim ushtarak për avancimin e kapaciteteve të Forcës së Sigurisë së Kosovës (FSK), si dhe informoi homologun e tij për progresin e deritanishëm të FSK-së në ngritjen e kapaciteteve profesionale dhe operacionale.
Gjithashtu, Maqedonci e vuri theksin mbi rëndësinë strategjike të synimeve euroatlantike të Kosovës, veçanërisht për anëtarësimin në Bashkimin Evropian dhe NATO, të cilat i cilësoi si çelësa për stabilitetin afatgjatë të rajonit.
Nga ana e tij, ministri Pfister shprehu vullnetin e Zvicrës për të thelluar bashkëpunimin me Kosovën dhe për të mbështetur përpjekjet e saj për një siguri të qëndrueshme dhe zhvillim të qëndrueshëm në rajon. Takimi u mbyll me konfirmimin e ndërsjellë për forcimin e partneritetit dhe koordinimin në fushat me interes të përbashkët./Katror.info
