Deputetja e Nismës Socialdemokrate, Xhevahire Izmaku, ka deklaruar sot se pret që gjatë fundjavës të arrihet marrëveshja ndërmjet kryetarit të Nismës, Fatmir Limaj, dhe liderit të Lëvizjes Vetëvendosje, Albin Kurti, për zgjidhjen e ngërçit politik dhe formimin e institucioneve të reja.
Në një prononcim për media, Izmaku theksoi se partia e saj nuk ka hequr dorë nga kërkesa që Limaj të jetë në krye të Kuvendit të Kosovës, si pjesë e marrëveshjes eventuale me LVV-në.
“Jo, absolutisht. Ne jemi në atë diagonale të bisedimeve me çështjen që zoti Limaj të jetë në krye të Kuvendit dhe presim në fundjavë që të ketë një epilog pozitiv të bisedimeve,” tha Izmaku.
Mundesh me e lexu edhe…
Ajo shtoi se Limaj ka treguar gatishmëri për të tejkaluar interesat personale dhe partiake në funksion të interesit shtetëror.
“Të shpresojmë që më në fund dikush po del mbi egot personale dhe partiake, e ky duket që do të jetë zoti Limaj, sepse që nga fillimi e ka ndryshuar diskursin politik në këtë vend,” u shpreh deputetja.
Izmaku u shpreh optimiste se takimet që po zhvillohen ndërmjet liderëve do të kenë rezultat konkret në ditët në vijim.
“Të shpresojmë që kjo marrëveshje, këto bisedime që kanë shkuar me muaj të tërë, ta prodhojnë një rezultat dhe Kosova të ketë institucione,” përfundoi ajo.
Deklarata e saj vjen në kohën kur vendi ndodhet në një ngërç institucional, me përpjekje të shumta të pasuksesshme për konstituimin e legjislaturës së re pas zgjedhjeve të 9 shkurtit. Afati kushtetues për formimin e institucioneve përfundon më 26 korrik 2025./Telegrafi./Katror.info
