Bashkimi Evropian ka disbursuar dy pagesat e fundit në kuadër të Kontratës së Reformës Sektoriale IPA 2016 për Reformën e Administratës Publike, me një shumë totale prej 6.87 milionë eurosh.
Zyra e BE-së në Kosovë njofton se me këtë disbursim përmbyllet mbështetja financiare në vlerë prej 22 milionë eurosh e dhënë nga BE-ja për këtë kontratë.
Sipas njoftimit kjo mbështetje ka pasur për synim fuqizimin e institucioneve qendrore të Kosovës në përmbushjen e objektivave kryesore të reformës së administratës publike. Ndihma e BE-së kontribuon në: forcimin e planifikimit të politikave dhe atij legjislativ, avancimin e llogaridhënies, transparencës dhe efikasitetit në administratën publike, rritjen e profesionalizmit dhe depolitizimin e shërbimit civil, përmirësimin e ofrimit të shërbimeve për qytetarët dhe bizneset në Kosovë.
Mundesh me e lexu edhe…
Tutje në njoftim thuhet se pavarësisht progresit të arritur deri më tani, mbetet nevoja për përpjekje të mëtejshme në përmirësimin e kornizës ligjore dhe institucionale, si dhe ndërtimin e kapaciteteve më të forta në institucionet qendrore, shkruan RTK.
“Zbatimi i qëndrueshëm dhe efektiv i këtyre reformave është thelbësor për të sjellë përfitime konkrete për të gjithë qytetarët e Kosovës. Bashkimi Evropian vazhdon të qëndrojë pranë Kosovës dhe të përkrahë popullin e saj”, thuhet ne njoftim./Katror.info
