Mbi 90 për qind e tokës bujqësore në komunën e Mamushës është tashmë e elektrifikuar. Ky investim ka lehtësuar ndjeshëm punën fizike të bujqve, duke kursyer kohë dhe ulur ndjeshëm kostot e prodhimit.
Sipas fermerëve, procesi i ujitjes që më parë zgjaste me ditë, tani përfundon për vetëm dy orë. Kjo ka sjellë efikasitet më të madh, sidomos në kultivimin e perimeve në serra, që është veprimtaria kryesore bujqësore në këtë komunë, shkruan RTKLive.
Falë investimeve të komunës në zgjerimin e rrjetit elektrik në zonat bujqësore, edhe parcelat që më parë ishin të papërdorshme janë futur në funksion. Rryma ka bërë të mundur ujitjen automatike dhe mbajtjen e temperaturës së qëndrueshme në serra.
Mundesh me e lexu edhe…
Fermeri Sedat Thaqi thotë se investimi ka rritur ndjeshëm prodhimin dhe ka zvogëluar shpenzimet. Ndërkohë, Nexhat Morina thekson se tani për vaditjen e një serre i duhen vetëm dy orë, në krahasim me ditët e tëra që kërkonte më parë.
Sipas drejtorit të Bujqësisë në komunën e Mamushës, Rruzhdi Mazrek, për këtë projekt janë investuar rreth 600 mijë euro. Elektrifikimi pritet të sjellë përfitime afatgjata për bujqësinë lokale dhe të rrisë potencialin prodhues të zonës./Katror.info
