Edhe sivjet kanë vendosur të shfaqin atë që shpesh fshihet: pasurinë kulturore të një populli të cilët janë banorë të botës. Kjo jo veç në mënyrë figurative, por me vërtetësinë e bashkëjetesës së tyre në pothuajse çdo cep anë e kënd globit.
E kanë ndarë mendjen që të kenë një program sa më gjithëpërfshirës dhe në secilën pjesë ia kanë vënë vetes qëllimet. Me kinematografi do i luftojnë tabutë shoqërore e diskriminimin sepse besojnë se “kinemaja dhe filmat janë një nga mjetet më me ndikim për të kuptuar dhe mësuar horizonte të reja dhe mendje të hapura“.
Në muzikë do të shpërfaqin pasuritë ritmike e kulturore, ndërkaq preokupimet do i shprehin nëpërmjet paneleve të diskutimit, leximeve letrare e bashkëveprimeve me natyrën.
“Rolling Film Festival” është gati të pushtojë Prishtinën dhe këtë do ta bëjë me një moto intriguese. Nga 20 deri më 26 qershori, Kino Armata dhe ish – biblioteka “Hivzi Sulejmani” apo Qendra për Praktikë Rrëfyese do të kumbojë me “Voiceless Voices”.
Me mesazhin e zgjedhur për të kumbuar me zërin e komunitetit rom dhe shpërfaqjes së vlerave të tyre, organizatorët janë gati për një aventurë kulturore gjashtë ditore.
“Ne jemi të bindur se festivali ynë do të sjellë emocion, frymëzim dhe ndërgjegjësim të përbashkët për të gjithë pjesëmarrësit. Përvoja e çmuar e kinemasë do të ndërtojë ura të reja të komunikimit dhe do të sjellë njohuri të reja që do të na bëjnë të shohim botën nga perspektiva të ndryshme”, thotë që në fillim të intervistës për Katror Media , organizatorja Pranvera Begolli.
Krijimi i një mjedisi për përfaqësim të dinjitetshëm për komunitetin rom është ajo që e drejton misionin e edicionit të 7-të të këtij Festivali.
“Motoja ‘Voiceless Voices’ përfaqëson misionin tonë për të krijuar një platformë për historitë e heshtura dhe për të dëgjuar zërat që nuk janë bërë të dëgjuar mjaftueshëm në shoqëri. Përmes shfaqjes së filmave që eksplorojnë narrativat e komunitetit rom, synojmë të thyjmë stereotipet, të sfidojmë paragjykimet shoqërore dhe të ndërtojmë hapësira për dialog, ndjeshmëri dhe ndryshime sociale”, shprehet tutje koordinatorja e festivalit.
Në programin e tyre zënë vend filma me rrëfime prej më të ndryshmeve por që emërues të përbashkët kanë fatin e komunitetit në kultura të ndryshme. Janë copëza kinematografike nga Gjermania, Franca, Hungaria, Kosova, Romania, Serbia.
“Një nga filmat që do të doja të theksoja është ‘School for Little Miss Roma’ (Shkolla për zonjushat e vogla Roma). Ky film i gjatë 80 minutash është një rrëfim i veçantë që shqetëson realitetin e një shkolle të veçantë për fëmijët rom. Filmi trajton sfidat dhe arritjet e këtyre fëmijëve në përpjekjet e tyre për të mësuar dhe për të ndikuar në shoqërinë ku jetojnë”, veçon Begolli.
Një nga filmat vendor është “Melody and music” nga regjisorët Faton Mustafa dhe Sami Mustafa, me të cilët do të zhvillohet edhe Q&A për të shpalosur para audiencës filmin nga pikëpamja e autorëve. Në këtë listë është edhe “Romni” nga regjisorja Amanda Fisher, e cila poashtu do t’iu përgjigjet pyetjeve të publikut.
“Një tjetër film interesant është “Romani”, i cili zgjat 15 minuta. Ky film paraqet një histori të ndjeshme për jetën e një familjeje rom dhe sfidat që hasin në përpjekjet për të ruajtur identitetin e tyre dhe për të përballuar paragjykimet shoqërore”, tregon tutje ajo.
Por filmat s’janë tërësia e këtij edicioni. “Music 4 all”, “Proud Roma” “Jimmy Band”, “Kal Band” janë disa nga premtuesit e gjallërisë së mbrëmjeve muzikore të sivjetshme.
“Grupi “Music 4 All” është një grup muzikor që vjen nga Plemetina dhe përbëhet nga talentë të shquar të komunitetit rom. Ata sjellin energji të lartë dhe zëra të mrekullueshëm në skenë, duke ofruar një përzierje të mahnitshme të zhanreve muzikore, duke përfshirë jazz-in, flamencën dhe elemente të muzikës tradicionale rome”, tha Begolli për Katror.
Koordinatorja e “Rolling Film Festival” përfundon intervistën duke theksuar se veçantia e tyre si festival qëndron në faktin e targetimit të audiencës.
“Ne fokusohemi më shumë tek njerëzit sesa tek industria e filmit dhe kur flasim për njerëz flasim për politikën, jetën shoqërore, kulturore dhe artistike të romëve”, shprehet Begolli.
Për më shumë detaje: https://rollingfilm.org/index.php?id=programs / Katror.info
Përgatiti:
