DJ Dark Child, emri artistik me të cilin Jeton Kadriu tashmë njihet për publikun e gjerë, është shqiptari që me muzikën e tij po argëton jo vetëm rininë shqiptare, por edhe atë evropiane.
Ai lindi në qytetin e Gostivarit, ku kaloi një pjesë të bukur të jetës së tij, para se të shpërngulej në Zvicër, aty ku jeton dhe punon që nga viti 2015. Studimet i ka përfunduar në Universitetin Shtetëror të Tetovës, shkruan Albinfo.
“Nuk kam pasur gjithçka që dua, por nuk më ka munguar asgjë”, shprehet Jetoni, teksa tregon për fëmijërinë dhe jetën në qytetin e lindjes para se të shpërngulej në Zvicër. Ai thotë se prindërit kanë luajtur rol kyç në zhvillimin e tij, si personal, ashtu edhe profesional, e për këtë ai është shumë falënderues.
Nga ëndrra për t’u bërë futbollist i shquar, te zbulimi i pasionit për muzikën
Pasioni i parë për Jetonin nuk ka qenë muzika, por sporti. Kështu, ai që në fëmijëri ka ëndërruar fushat e blerta dhe të bëhet futbollist. Planet i ndryshuan pas një lëndimi që pësoi, duke i ndalur kështu ëndrrën në gjysmë.
“Është interesant fakti se plani i jetës sime nuk ishte të bëhem DJ, por futbollist i shquar. Mirëpo kjo nuk ndodhi dhe ja ku jam sot si një DJ i mirënjohur. Pasioni im për muzikë ka lindur që nga koha e gjimnazit, në vitin 2008, kur në një ekskursion me shkollën në Turqi kam pasur rastin të bëj muzikë për shoqërinë time. Kështu, unë nuk kam qenë fare në dijeni për talentin që kam deri në atë moment. Mund të them se ka qenë si dashuri me shikim të parë, pasi sapo kam parë pajisjet për DJ më kanë bërë për vete, edhe pse nuk e kisha as idenë më të vogël se si funksionojnë apo sa kushtojnë”, shprehet ai.
Ambientimi dhe jeta në Zvicër
Shpërngulja nga vendlindja mund të themi se për shumë njerëz është një proces jo i lehtë, duke marrë parasysh ambientimin me gjuhën, kulturën dhe traditën e vendit tjetër. Por, përkundrazi për Jetonin, siç duket, kjo periudhë nuk ka qenë aq e vështirë.
“Në Zvicër kam ardhur në vitin 2015 dhe ambientimi këtu nuk ka qenë i vështirë për mua, pasi ky shtet ka qenë gjithmonë qëllimi im. Që nga ardhja ime këtu jam ndier si në shtëpi. Fillimisht kam jetuar në Luzern, ku kam punuar me menaxhmentin, i cili më ka prenotuar në klube në qytete të ndryshme të Zvicrës, po ashtu edhe në Gjermani e Austri. Më pas që nga 2017-ta deri në fund të vitit 2021 në Cyrih, sepse që atëherë kam filluar punën në ‘‘Rinora 4’’ për të mos u ndalur kurrë sot e asaj dite. Ndërsa në fillim të vitit 2022 jam kthyer në Luzern për të bashkëjetuar me bashkëshorten time”, thotë ai.
Nga ana tjetër, fillimi i një karriere në një vend të huaj është mjaft sfidues e kështu ka qenë edhe për DJ Dark Child.
“Çdo fillestar, pa marrë parasysh profesionin, në fillim e ka të vështirë dhe arsyet janë të shumta. Në njërën anë nuk i kam pasur mundësitë financiare të blej pajisjet profesionale që më pëlqenin, prandaj më është dashur të punoj me muaj që të pajisem me gjërat e nevojshme, këtu dua ta përmend dhuratën e parë që e kam marrë nga nëna ime, një laptop me të cilin kam punuar në fillimet e mia dhe të cilin do ta ruaj gjithmonë. Në anën tjetër, jam ballafaquar me nënvlerësim, urrejtje dhe përqeshje nga njerëz të tjerë. Të paktë kanë qenë ata që besonin në mua se një ditë do të “shpërthej”. Kështu përveç që duhej të luftoja për një vend pune, duhej t’i luftoja edhe shumë paragjykime’’, tregon DJ shqiptar./Katror.info