Ministria e Shëndetësisë e Kosovës ka bërë thirrje për zbatimin e masave mbrojtëse për punëtorët, në përballje me temperaturat e larta që priten gjatë periudhës 3 deri më 10 korrik 2025. Kjo thirrje bazohet në rekomandimet e Institutit Kombëtar të Shëndetësisë Publike të Kosovës (IKShPK), shkruan Katror.info.
Në njoftimin zyrtar thuhet se temperaturat e larta kanë ndikim të drejtpërdrejtë dhe negativ në shëndetin e njeriut, veçanërisht tek grupet më të ndjeshme të shoqërisë, si fëmijët, të moshuarit, gratë shtatzëna, personat me sëmundje kronike, si dhe punëtorët që punojnë në ambient të hapur apo në kushte me ngarkesë të lartë termike.
Ministria apelon ndaj të gjitha institucioneve publike dhe private që të zbatojnë rekomandimet për mbrojtjen e punëtorëve, duke synuar parandalimin e pasojave shëndetësore që mund të shkaktohen nga ekspozimi në temperatura ekstreme.
Mundesh me e lexu edhe…
Qëllimi i këtij reagimi është mbrojtja e shëndetit publik dhe garantimi i kushteve më të sigurta të punës në ditët kur vendi do të përballet me nxehtësi të lartë./Katror.info
