Një ekip i mjekëve nga Holanda, i udhëhequr nga onkologu pediatrik Rob Pieters, drejtor i PMC International, ka qëndruar në Kosovë për të forcuar bashkëpunimin mes Qendrës Klinike Universitare të Kosovës (QKUK) dhe “Princess Máxima” në Holandë.
Në kuadër të këtij bashkëpunimi, është nënshkruar një marrëveshje mirëkuptimi që parashikon trajtimin e përbashkët të fëmijëve me kancer. Pjesë e marrëveshjes është mundësia që disa pacientë të udhëtojnë në Holandë për trajtime të specializuara dhe më pas të rikthehen në Kosovë për të vazhduar mjekimin.
Rob Pieters në emisionin “Mirëmëngjesi Kosovë” në RTK theksoi se qëllimi i këtij misioni është jo vetëm trajtimi i kancerit në Holandë, por edhe ndihma dhe përmirësimi i qendrave të trajtimit në vendet e tjera të Evropës, për të lehtësuar jetën e fëmijëve të prekur nga kjo sëmundje.
Mundesh me e lexu edhe…
“Fondacioni Care for Kosovo ka qenë aktiv për një kohë të gjatë duke ofruar hemoterapi dhe ilaçe për trajtimin e fëmijëve me kancer në Kosovë. Qendra jonë ka kontribuar për vite me radhë duke dërguar mjekë për trajnime dhe tani kemi vendosur të intensifikojmë bashkëpunimin”, tha ai.
“Marrëveshja parashikon gjithashtu edukimin e mjekëve dhe infermierëve në Kosovë për diagnostikim dhe trajtim më të mirë, si dhe mundësinë e dërgimit të pacientëve për trajtime të avancuara në Holandë, në rast se këto nuk mund të ofrohen në QKUK”, shtoi ai.
Ky bashkëpunim sipas Pieters do të vazhdojë derisa QKUK të arrijë nivelin e Qendrës Princess Maxima. Ai shprehu shpresën që në të ardhmen trajtimi i fëmijëve me kancer në Kosovë të jetë plotësisht i pavarur.
Ai theksoi se kjo marrëveshje është në dobi të pacientëve, mjekëve dhe sistemit shëndetësor në Kosovë, duke ofruar trajtim cilësor dhe duke reduktuar shpenzimet e panevojshme./Katror.info
