Në Qendrën Klinike Universitare të Kosovës (QKUK), është realizuar me sukses një ndërhyrje kirurgjikale e rrallë dhe jashtëzakonisht e ndërlikuar për trajtimin e një të porsalinduri me atresion të arteries pulmonare – një gjendje e rëndë kardiake që rrezikon jetën. Kjo procedurë përfaqëson ndërhyrjen e parë të këtij lloji të kryer në Ballkan, shkruan Katror.info.
Operacioni u bë i mundur në kuadër të një misioni humanitar të organizatës ndërkombëtare Muntada Aid, në bashkëpunim të ngushtë me një ekip të specializuar mjekësh nga Turqia dhe profesionistët e Klinikes së Pediatrisë, Kirurgjisë së Fëmijëve, Anestezionit dhe Neonatologjisë në QKUK.
Ky mision ka për synim trajtimin e 12 fëmijëve me sëmundje të rënda të lindura në zemër. Falë përkushtimit të përbashkët të mjekëve vendorë dhe atyre ndërkombëtarë, deri tani janë kryer me sukses disa ndërhyrje, përfshirë edhe rastin e të porsalindurit që mori një shans real për jetë të shëndetshme.
Mundesh me e lexu edhe…
Shërbimi Spitalor dhe Klinik Universitar i Kosovës (ShSKUK) ka shprehur mirënjohje të thellë për kontributin e organizatës Muntada Aid dhe ekipit të mjekëve turq për mbështetjen dhe ekspertizën e tyre. Në veçanti, janë falënderuar profesionistët Prof. dr. Ilker Yucel, Prof. dr. Halil Demir, Prof. dr. Oktay Korun, Dr. Abid Karagoz, Dr. Ramush Bejiqi, si dhe teknikët dhe stafi mbështetës: Emre Ozturk, Ercan Ersoy, Husnyie Kaya dhe Musa Turgut./Katror.info.
