Sa nga ne i njohim ikonat në fushën e artit, që nuk janë më? E sa nga ne dimë për krijimtarinë e tyre që la gjurmë dhe trasoi rrugën për ne dhe brezat që do të vijnë?
Libri monografik “Mjeshtri që e bëri punën sikur të ishte e lehtë”, hedh dritë mbi figurën e shquar të Abdurrahman Shalës, aktorit, regjisorit, producentit e këngëtarit që për pothuaj 40 vjet, në kohëra shumë të vështira, e bëri punën sikur të ishte e lehtë.
Kontributi i në themelimin e skenës teatrore dhe filmike në Kosovë, në themelimin e shtëpisë filmike “Kosova Filmi e në shumë fusha tjera u vlerësua në promovimin e monografisë për jetën dhe krijimtarinë e tij të hënën në mbrëmje, në 30 vjetorin e vdekjes së tij.
Mundesh me e lexu edhe…
“Ajo që më ka fascionuar mua është se në të gjitha profilet që ka punuar ka pasur profesionalizëm dhe një nivel të lartë të performancës, njëkohësisht edhe me shumë përgjegjësi e këmbëngulje për të çuar përpara dhe për të ngritur standardin e të krijuarit teatër dhe film në Kosovë, gjithmonë në favor të së mirës së përgjithshme” ka thënë autori i monografisë, Visar Krusha.
Me 48 projekte filmike ku ka marrë pjesë si aktor, regjisor e producent, 58 shfaqje në cilësi të ndryshme, 24 radiodrama e këngëtar i nëntë këngëve, Shala i lindur më 1922 në Vushtrri është prej ikonave artistike me të cilat identifikohen teatri e filmi i Kosovës e përtej.
Sipas Ministrit të Kulturës, Hajrulla Çeku Shala ka lënë gjurmë të pashlyeshme në historinë e institucioneve publike kulturore.
“Si anëtar i Trupës së Aktorëve të Teatrit Kombëtar ai ishte një nga themeluesit e sektorit të dramës shqipe në këtë institucion. Bashkë me kolegët e gjeneratës së tij luajtën për herë të parë në skenë në gjuhën shqipe, por edhe në atë turke. Abdurrahman Shala është regjisori i parë shqiptar në këtë teatër, madje duke sjellë edhe tekstin e parë në shqip, ‘Nuk martohem me pare’ të Murteza Pezës”, ka thënë ai.
Libri monografik një pjesë të madhe ia ka kushtuar “Lalkës”, ashtu si e thërrisnin në shtëpi, Abdurrahman Shalën, I cili shquhej për rreptësinë në fytyrën e tij, por që përbrenda, ishte shpirtmirë dhe I butë.
“Mënyra se si ai na ka dashur, mënyra se si ai na ka përkëdhelur, si na ka përqafuar dhe si dhe kur na ka komplimentuar na ka përmbushur me dashuri dhe siguri që ende sot na përcjell. Porosia që ai ne na ka lënë ka qenë: ‘Kur e bën një punë, çfarëdo pune që është, bëjë me zemër’”, ka treguar Miranda Shala, e cila e ka përshkruar aktorin si vizionar.
Në libër shpaloset fëmijëria e hershme e Abdurrahman Shalës dhe jeta e tij buzë detit në Shqipërinë Monarkike, përpjekja e tij e dështuar për t’u pranuar në Shkollën e Aktrimit në Beograd, aprovimi i ftesës së motrës së tij Mehribanes për t’iu bashkuar grupit të parë të trupës së aktorëve shqiptarë në Teatrin e Kosovës, pjesëmarrja e së cilit në këtë institucion i dha vulën e “nismëtarit” për shumë projekte teatrale e filmike, të cilat janë paraqitur së bashku përvojat e kolegëve e familjarëve të aktorit, duke prekur thelbin e figurës së tij.
Libri Monografik ”Mjeshtri që e bëri punën sikur të ishte e lehtë” e autorit Visar Krusha është i katërti në radhë që botohet nga OJQ “Integra” pas monografive për artistët e shquar: Faruk Begolli, Nexhmije Pagarusha dhe Muharrem Qena./Katror.info
Përgatiti:
