Pas gati gjashtë dekadash kërkimi, Trish dhe June më në fund përqafuan motrën e tyre të humbur, Geraldine, falë një testi ADN-je që solli përgjigje të pabesueshme.
Tashmë në të 60-at e tyre, Trish dhe June kanë kaluar jetën duke kërkuar motrën më të madhe, Geraldine, e cila ishte vetëm katër vjeçe kur nëna e tyre, Mary Wills, u detyrua ta jepte për adoptim nga një rend murgeshash katolike në Irlandë. Mary më pas u zhvendos në Angli, ku ndërtoi një familje të re dhe pati tre fëmijë të tjerë, shkruan GoodNewsNetwork, përcjell Katror.info.
Edhe pse gjithmonë e kishin ditur se kishin një motër më të madhe, motrat nuk arritën ta gjenin Geraldinen sa ishte gjallë nëna e tyre, e cila vdiq nga kanceri në mëlçi në vitin 2011.
Mundesh me e lexu edhe…
Kthesa ndodhi në fund të vitit 2023, kur Trish i dhuroi vajzës së saj, Laura, një test ADN-je nga Ancestry për Krishtlindje. Fillimisht nuk pati ndonjë përputhje, por muajin e kaluar u zbulua një lidhje e qartë: Geraldine kishte ngarkuar të dhënat e saj në të njëjtin sistem.
Laura i shkroi Geraldinës për herë të parë më 1 prill – dhe siç e pranoi më vonë, të dyja palët menduan se ishte një shaka për Ditën e Gënjeshtarëve.
“Kur më tha Laura se e kishte gjetur Geri-n, nuk e besoja. M’u duk si një shaka. Edhe Geri mendoi të njëjtën gjë”, tha Trish për agjencinë e lajmeve SWNS.
Pas bisedave me video, tre motrat u takuan për herë të parë fizikisht para dy javësh në Somerset të Anglisë dhe ndjenë menjëherë një lidhje të fortë.
“Ishte shumë emocionale. Sapo e pashë, ndjeva dashuri të menjëhershme për të”, tha Trish. “Ne qeshim njësoj dhe ngjajmë jashtëzakonisht shumë. Ndihemi sikur mamaja është me ne – kjo është ajo që ajo do të kishte dashur.”
Geraldine vizitoi varrin e nënës për herë të parë – një moment që i mbylli plagët e një ndarjeje të detyruar shumë vite më parë./Katror.info
