“Kjo është puna ime e parë. Unë kam nis me punu pas moshës 52 vjeçare.”
Kështu thotë Sanije Morina, jeta e së ciles mori kahje tjetër në moshën 52 vjeçare, kur iu hap mundësia e punësimit.
“Unë kam qenë konsumatore e rregullt e Meridianit edhe vendosa me ju bashkëngjitë iniciativës “Gra për gra.” Unë ju kisha thanë të gjitha grave, pa marrë parasysh moshës, shkollimit e të gjitha sendet, me u inkuadru nëpër kompani private edhe mos me nejt pasive tanë kohën.”
Mundesh me e lexu edhe…
Një derë punësimi për gratë e moshës së mesme e kanë hapur Meridian Express dhe SPAR në bashkëpunim me zyrën e UN Women Kosovë, të cilët lansuan iniciativën “Shfrytëzo potencialin: Hajde puno me ne”, iniciativë kjo e cila synon trajnimin, ri-aftësimin dhe punësimin e grave të moshës së mesme.
Përmes kësaj nisme Sanije Morina, filloi një përvojë të re në jetën e saj, e cila ia ndryshoi rutinën e saj prej vitesh. Andaj, ajo u bën thirrje të gjitha kompanive që të mos e anashkalojnë këtë grupmoshë në dhënien e mundësive dhe hapësirës për punë.
“Ju kisha ba thirrje të gjitha kompani private, pa marrë parasysh gratë e moshës së mesme mos m’i anashkalu, por me i inkuadru të gjitha, pa marrë parasysh moshës, shkollimit, secila femër shqiptare me kanë e inkuadrume në çdo aktivitet, pa marrë parasysh çfarë aktiviteti, panaire, trajnime. Me dalë, le të shohin të ardhmen e tyre përpara, se kurrë mosha nuk është pengesë për me ba një aktivitet, një punë pa marrë parasysh çka”, shprehet Sanija.
Merita Qerimi, është udhëheqëse e burimeve njerëzore në Meridian Express. Në një intervistë për Katror Media, ajo thotë se integrimi i grave të moshës së mesme në tregun e punës ka qëllim fuqizimin ekonomik të grave.
“Në Meridian Express, në pikat shitëse, 70 përqind e fuqisë punëtore janë gra, ndërsa 30 përqind prej tyre i i takojnë kësaj grupmoshe”, thotë ajo.
Kjo kompani, e cila në bashkëpunim me UN Women, ka nënshkruar parimet mbi fuqizimin e grave, synon që shifra e grave të punësuara që i takojnë moshës së mesme të rritet në mbi 100.
“Njëra ndër veçoritë tona në Meridian Express është trajtimi i barabartë i të gjithëve. Kështu që të gjitha kategoritë te ne janë të mirëseardhura, të gjitha gratë e kësaj grupmoshe domethënë janë të mirëpritura dhe janë mirëpritë prej gjithë stafit, kështu që për neve të gjithë janë të barabartë. Dallohemi si punëdhënës në pjesën e trajtimit të njerëzve në mënyrë të barabartë edhe fuqizimin e grave”, shtoi Merita.
Zyra e UN Women në Kosovë, me rastin e lansimit të nismës “Shfrytëzo potencialin: Hajde puno me ne” ka thënë se nisma është tejet e rëndësishme për fuqizimin e grave në moshë të mesme duke i integruar apo riintegruar ato në tregun e punës. Sipas kësaj zyre, fuqizimi i grave të moshës së mesme përmes punësimit, jo vetëm që do t’i pasurojë jetët e tyre, por gjithashtu forcon pozitën e tyre në shoqëri dhe familje, duke çuar kështu në zhvillim të përgjithshëm ekonomik.
E Merita Qerimi, mendon se kjo grupmoshë, fatkeqësisht, është lënë pas dore për një kohë të gjatë.
“Me UN Women kemi bërë bashkëpunime edhe më herët, dhe do të vazhdojmë ta mbështesim këtë kategori. Mendojmë se është një kategori e cila ka nevojë për mbështetje më të madhe për shkak të mënyrës së rritjes, edukimit, është një kategori e lënë më anash e ne përmes këtij projekti synojmë që të vetëdijësojmë më shumë, të bëjmë trajnime vetëdijësuese të bëjmë programe të veçanta përmes partnerëve të UN-it dhe t’i integrojmë apo riintegrojmë në vende të punës këtë kategori, këtë grupmoshë”, shtoi ajo.
Merita ka një mesazh për të gjitha kompanitë tjera që të inicojnë projekte për përfshirjen dhe fuqizimin sa më të madh të grave.
“Mesazhi kryesor për të gjitha kompanitë kishte me qenë: Jepini mundësi grave sa më shumë, jepini hapësirë të zhvillohen dhe të trajnohen, për shkak se së bashku mund të kontribuojmë në komunitet që, me pasë një fuqi ma të madhe te gratë, mundemi me kontribu në pavarësimin e saj ekonomik dhe në zhvillimin dhe trajnimin e tyre”, shprehet ajo.
Gratë përbëjnë forcë vitale në ekonomi në gjithë botën, duke kontribuar në mënyrë substanciale si në ndërmarrjet biznesore dhe po ashtu përmes punës së tyre të paçmuar të kujdesit të papaguar në shtëpitë e tyre.
Sektori privat si punëdhënësi më i madh i grave në mbarë botën, është thelbësor në avancimin e barazisë gjinore dhe fuqizimin e grave, e në veçanti të grupmoshave si Sanija, e cila duke u punësuar në moshën 52 vjeçare, pos që ndryshoi mënyrën e jetesës, tashmë ndjehet e fuqizuar dhe e pavarur ekonomikisht. /Katror.info
Edicionin #43 të plotë e gjeni KËTU
Përgatiti:
