Banka Qendrore e Austrisë ka bërë një vrojtim të tregut të pasurive të paluajtshme në Evropën Juglindore dhe Ballkanin Perëndimor.
Sipas këtij hulumtimi, ekonomia shqiptare është më e varura nga sektori i ndërtimit.
Në vitin 2022 vlera e shtuar e ndërtimit ishte 12%, dy herë më e lartë se mesatarja në shtetet e Evropës Juglindore, teksa pas Shqipërisë vjen Kosova me gati 11%, përcjell albinfo.
Gjithashtu, Shqipëria kryeson renditjen për investimin në banesa (matur si shpenzimet e formimit të kapitalit bruto), në masën 12%, gjë që tregon se banesat shihen si një formë investimi me kthime të shpejta kundrejt mungesës së zhvillimit të tregjeve të kapitalit.
Ky institucion evidenton se kredia e marrë për blerje banese është gati katër herë më ulët se vendet e Evropës Juglindore, por fenomeni është i shpërndarë dhe në vendet e tjera të Ballkanit Perëndimor, teksa thueht se një burim i rëndësishëm financimi janë pikërisht remitencat nga diaspora, shkruan TCH.
Sa u përket çmimeve, Shqipëria rezulton me rritjen më të fortë që nga viti 2019, me 90% sipas indeksit fischer të Bankës së Shqipërisë. Në Serbi rritja ishte me 58%, ndërsa në Maqedoninë e Veriut me rreth 40%.
Sipas anketimit nga BQA, shumica e familjeve shqiptare presin që çmimet e pronave të rriten më tej, ndërsa pritjet për çmimin e banesave janë të ndërlidhura me aktivitetin ekonomik si dhe me pritjet e inflacionit.
Ndryshe, një tjetër fenomen i vërejtur është se ndërtimi në Shqipëri punëson rreth 7% të gjithë forcës punëtore, duke treguar në këtë aspekt se nuk luan një peshë domethënëse në tregun e punës, rrjedhimisht më pak kontribut në ekonominë reale./Katror.info