Sonte, qyteti i Deçanit do të gjallërohet nga ngjyrat dhe ritmet e një feste ndërkombëtare kulturore, me rikthimin e festivalit “Newborn Kosova”, shkruan Katror.info.
Kjo ngjarje, e cila po mbahet për herë të katërt radhazi mbledh në Deçan rreth 180 artistë nga vende të ndryshme të botës, duke sjellë një përzierje të pasur të artit, muzikës dhe traditave kulturore në zemër të qytetit.
Përmes një postimi në rrjetet sociale, kryetari i komunës së Deçanit, Bashkim Ramosaj, ka mirëpritur këtë organizim.
Mundesh me e lexu edhe…
“Sonte në Deçan rikthehet Festivali ‘Newborn Kosova’ me 180 artistë nga e gjithë bota! Vallëzim, muzikë dhe kulturë ndërkombëtare në zemër të qytetit!”, shkroi Ramosaj, duke ftuar qytetarët të marrin pjesë në ngjarjen kulturore.
Aktivitetet e festivalit nisin në ora 19:00 me një parakalim të grupeve artistike nëpër qendrën e qytetit, ku pritet të krijohet një atmosferë e gjallë dhe e larmishme me elemente nga kultura të ndryshme.
Më vonë, duke filluar nga ora 20:00, programi vazhdon në ambientet e Qendrës Rinore, ku do të prezantohen performanca muzikore dhe kërcime tradicionale nga pjesëmarrësit ndërkombëtarë.
“Newborn Kosova” tashmë ka fituar një emër si platformë e bashkëpunimit kulturor dhe ndërkombëtar, duke e kthyer Deçanin në një pikëtakim të rëndësishëm të artistëve dhe audiencës brenda dhe jashtë vendit./Katror.info
Përgatiti:
