Komuna e Prishtinës ka hapur thirrjen për aplikim të operatorëve privatë, të cilët pritet të paguhen nga janari i vitit 2025, 2.49 euro për kilometër, njësoj si transportuesit publikë.
Të dëmtuar e të amortizuar janë shumica e autobusëve urbanë privatë, e në këto ditë të nxehta operojnë pa klimë. Madje as operimi i tyre nuk bëhet me orare të rregullta.
Në këtë mënyrë qytetarët po preferojnë përdorimin e autobusëve të “Trafikut Urban”. Transportuesit privatë ka disa vjet që kërkojnë ndihmë nga Komuna e Prishtinës për të dalë nga kjo krizë. Kërkesa për t’u paguar për kilometër, njësoj si “Trafiku Urban”, më në fund po realizohet.
Mundesh me e lexu edhe…
Komuna e Prishtinës ka hapur thirrjen për aplikim të operatorëve privatë, të cilët pritet të paguhen nga janari i vitit 2025, 2.49 euro për kilometër, njësoj si transportuesit publikë, shkruan koha.
Izet Smajli, nga Shoqata e Transportuesve Privatë, thotë se kjo thirrje është mirëpritur shumë nga operatorët privatë, e që me këtë pritet edhe përmirësimi i shërbimit për qytetarët.
“Disa kompani kanë pasur vështirësi në aspektin e shitjes së biletave, ka rënë shitja e biletave me ardhjen e autobusëve të Trafikut se iu kanë ndërhyrë në linjë. Edhe kështu kanë qenë në gjendje të vështirë, prandaj kemi kërkuar që të rregullohet transporti dhe riorganizimi i duhet. Ne si transport privat e mbulojmë 60 për qind të territorit të Prishtinës. Kemi kompani të cilat janë shuar, siç është linja 5, ku ‘Trafiku Urban’ i ka ndërhyrë komplet në linjë. Ajo është detyruar ta ndërpresë se ka punuar me humbje”.
Me nënshkrimin e kësaj kontrate pritet edhe përmirësimi i kushteve për punëtorët.
“Normal që do të ketë kushte edhe më të mira, edhe paga më të mira dhe rregull në çdo aspekt. Për momentin në transportin publik-privat paga është qesharake. Ka operatorë që brenda muajit 120 euro nuk kanë arritur t’i nxjerrin. Paga shkon 200-250 nuk shkon bile, edhe më dobët është. Besoj që me pagesë për kilometra edhe me kompanitë private do të rregullohet çështja”, tha Smajli.
Me arritjen e kësaj marrëveshjeje transportuesit privatë janë të detyruar që të ndërrojnë edhe flotën e autobusëve, të cilat do të jenë të ngjashme me ato të “Trafikut Urban”.
Sipas Komunës së Prishtinës, kontrata do të hyjë në fuqi në janar të vitit 2025, ndërsa kompletimi i flotës së autobusëve duhet të bëhet deri në qershor të të njëjtit vit.
“Në formën që është paraparë të bëhet, pagesa për kilometër ua mundëson atyre të ardhurat dhe besoj ka me pasë sukses, pra po bazohemi tek ‘Trafiku Urban’ se në momentin që janë blerë autobusët B51, kemi një ndryshim pozitiv dhe kemi kërkesa të rrisim linjat dhe numri e nisjeve. Në këtë formë mund të ndikojmë tek operatori edhe te orari i nisjes së linjave dhe do të ketë ndryshim pozitiv. Pra nuk do të ketë vonesa për shkak të humbjeve të tyre”, tha Enver Kadriu, zyrtar i lartë për Shërbime Publike.
Deri në qershor të vitit të ardhshëm pritet të vijnë edhe autobusët e rinj, e në këtë mënyrë do të mund të bëhet rimodelimi i të gjitha linjave, duke zbatuar kështu edhe planin e mobilitetit.
“Për momentin me Fushë-Kosovën e kemi një marrëveshje 50-50. Jemi duke tentuar të arrijmë një marrëveshje me të që edhe ata të aplikojnë të njëjtën kontratë, në rast se Komunës së Prishtinë s’i lejohet të operojë 100 për qind me ta, atëherë me ardhjen e autobusëve të rinj që do të bëhet me
‘Trafikun Urban’. Për momentin do të kenë linjën e njëjtë deri në qershor, sepse deri atëherë do të bëhet edhe ridizajnimi i linjave bazë”, shtoi Kadriu.
Kësaj thirrjeje kanë të drejtë t’i përgjigjen edhe kompanitë, të cilat e kanë shuar përkohësisht operimin e tyre, duke riaktivizuar linjën që kanë operuar më parë./Koha
Përgatiti:
