Ëndrra që për shumë të rinj në Kosovë nis nga një kompjuter modest, një server Faceit dhe një ndeshje e zakonshme në Counter-Strike, për Drin “makazze” Shaqirin është shndërruar në realitet. Vetëm 18 vjeç, ai është emri më i ri që po bën histori në skenën ndërkombëtare të eSports, pas promovimit të tij nga NAVI Junior në ekipin e parë të Natus Vincere (NAVI) – një nga organizatat më të njohura në botën e CS2.
Pas një viti të mbushur me paraqitje mbresëlënëse në NAVI Junior, makazze e fitoi besimin e trajnerëve dhe drejtuesve për të kaluar në radhët e më të mirëve. Tani, ai ndodhet në Barcelonë, ku ka nisur stërvitjet me skuadrën kryesore në prag të turneut prestigjioz IEM Cologne 2025, ku pritet të bëjë debutimin e tij zyrtar.
“Përkushtimi ndaj lojës dhe puna e palodhshme me ekipin e akademisë më kanë ndihmuar jashtëzakonisht shumë. Kam qenë gjithmonë i fokusuar dhe e kam pasur një qëllim të qartë: të arrij në ekipin e parë,“ u shpreh Shaqiri në një intervistë për Telegrafin, duke theksuar se ky kalim është rezultat i përgatitjes serioze që ka bërë ndër vite.
Mundesh me e lexu edhe…
Djaloshi nga Kosova nuk e fsheh as emocionin dhe përgjegjësinë që e pret në këtë fazë të re të karrierës. Ai do ta zëvendësojë “jL”, ish-MVP i Majorit të Kopenhagës – një detyrë aspak e lehtë për një lojtar kaq të ri.
“Ta zëvendësosh një MVP të Majorit është përgjegjësi e madhe. Por për mua, kjo tregon edhe besimin që NAVI e ka tek unë dhe kjo më motivon edhe më shumë që të dëshmohem në çdo ndeshje,” tha makazze, i vendosur që të shfrytëzojë këtë mundësi të rrallë.
Në këtë rrugëtim nuk është vetëm. Ai ka përkrahjen e trajnerit legjendar B1ad3, i cili është i njohur për zhvillimin e talenteve të reja dhe sukseset me NAVI-n ndër vite.
“B1ad3 është ndër trajnerët më me përvojë në CS. Me të besoj se do të rritem edhe më shumë si lojtar. Ai i njeh detajet, është shumë i përpiktë dhe di si të zhvillojë talentet. Është një mundësi e artë për mua që të punoj me të,“ u shpreh Shaqiri, duke shtuar se përgatitjet për IEM Cologne kanë nisur që nga 11 korriku dhe fokusi është maksimal.
Por rruga drejt suksesit ka pasur edhe momentet e veta të vështira. Inspirimin e parë, Shaqiri e gjeti te një ekip shumë më afër vendlindjes – Bad News Eagles, përfaqësuesit e parë shqiptarë në Major.
“Në fillim jam frymëzuar nga Bad News Eagles, veçanërisht nga Juanflatroo. Ka qenë modeli im prej ditës së parë. Më ka shty të besoj që edhe lojtarët shqiptarë mund të arrijnë në skenën më të madhe. Ata e hapën një derë që për shumë prej nesh dikur dukej e pamundur,” thekson ai.
I pyetur për ndonjë mesazh për të rinjtë që luajnë CS2 në Kosovë dhe që ëndërrojnë një rrugë si e tij, makazze është i drejtpërdrejtë:
“Mos e ndalni veten kurrë. Ndiqni ëndrrat tuaja, punoni çdo ditë dhe mos u dorëzoni. Me përkushtim dhe durim gjithçka është e mundur. Edhe unë kam qenë aty ku jeni ju, dhe kjo që po më ndodh tani është dëshmi që gjithçka mund të bëhet realitet.”
Shaqiri është jo vetëm një përfaqësues i ri i NAVI-t, por edhe një simbol frymëzimi për brezin e ri të lojtarëve shqiptarë. Me vendosmëri, talent dhe punë të palodhshme, ai është gati të tregojë veten në një nga skenat më të mëdha të CS2, dhe të çojë më tej historinë e suksesit të Kosovës në eSports./Katror.info.
Intervista u realizua nga Telegrafi Sport.
