Vetmia është një nga problemet më të mëdha të të moshuarve. Për shembull, vetëm në Britaninë e Madhe, rreth 1.4 milionë njerëz janë shpesh të vetmuar, nuk kanë partnerë, as miq dhe të afërm me të cilët janë shpesh në kontakt. Pikërisht në atë vend po fillon një projekt pilot, qëllimi i të cilit është të zbulojë nëse teknologjia moderne, veçanërisht realiteti virtual, mund t’i ndihmojë të moshuarit të ndihen më pak të vetmuar dhe t’u ofrojnë atyre një formë tjetër argëtimi dhe shoqërimi që mund të ketë një efekt pozitiv në mirëqenien e tyre.
Projekti i quajtur “Mirëqenia e Planetit” u lançua nga shkencëtarët e Universitetit Sheffield Hallam në bashkëpunim me organizatën Age UK Sheffield dhe gjatë testimit do të shpërndajnë kufje për realitetin virtual për të moshuarit. Ata do të jenë në gjendje t’i përdorin ato për argëtim dhe aktivitete sociale si lojëra letrash, vallëzim etj.
Kjo teknologji, besojnë shkencëtarët, ka potencial revolucionar në mënyrën se si mund të ndihmojë njerëzit në vitet e treta të jetës, veçanërisht duke përmirësuar mirëqenien dhe shëndetin e tyre mendor. Shkencëtarët nga universiteti i lartpërmendur theksojnë se testimi që ata po kryejnë bazohet në kërkime që kanë zgjatur më shumë se një dekadë dhe kanë treguar se si të moshuarit mund të motivohen për të ushtruar duke përdorur teknologjinë, përmes argëtimit dhe aktiviteteve sociale në botët virtuale, shkruan Katror.info.
Mundesh me e lexu edhe…
Pas testimit, i cili do të zgjasë një vit e gjysmë, do të bëhet një analizë e të dhënave të mbledhura gjatë asaj periudhe dhe nëse këto të dhëna tregojnë një ndikim pozitiv të teknologjisë në mirëqenien e të moshuarve dhe të vetmuarve, mund të nisë një nismë më e gjerë për të ndihmuar të moshuarit duke përdorur teknologji të tilla si pajisjet e realitetit virtual. /Katror.info
Përgatiti:
