Ka nisur zyrtarisht në Shqipëri stërvitja e përbashkët ushtarake “Defender Europe 2025”, një nga operacionet më të mëdha dhe më komplekse të dekadës së fundit në Evropë dhe Afrikë.
Në orët e para të mëngjesit të sotëm, trupat e Forcës Tokësore shqiptare u nisën nga garnizoni i Zall-Herrit drejt Qendrës së Stërvitjes në Bizë, duke shënuar hyrjen zyrtare të vendit në këtë ushtrim të rëndësishëm ndërkombëtar.
Stërvitja zhvillohet nën udhëheqjen e Komandës Evropiane të Shteteve të Bashkuara të Amerikës (EUCOM), në bashkëpunim me vendet aleate dhe partnere të NATO-s. Shqipëria është një nga vendet pritëse kryesore dhe luan një rol strategjik në garantimin e suksesit të operacioneve dhe zhvillimeve të planifikuara, raporton RTSH.
Mundesh me e lexu edhe…
Në total, mbi 25 mijë trupa nga 29 shtete marrin pjesë në “Defender 2025”, duke e bërë atë stërvitjen më të madhe të këtij lloji në rajon. Pjesë e kësaj stërvitjeje është edhe Kosova, ku trupat e Forcës së Sigurisë së Kosovës, bashkë me ushtarë nga SHBA dhe vende të tjera aleate, kanë nisur grumbullimin në Babaj të Bokës, në Gjakovë.
Ministri në detyrë i Mbrojtjes i Kosovës, Ejup Maqedonci, deklaroi për RTK-në se janë ndërmarrë të gjitha përgatitjet për pritjen dhe vendosjen e njësive pjesëmarrëse.
Në ditët në vijim, forcat ushtarake do të zhvillojnë një sërë stërvitjesh me fokus në forcimin e mbrojtjes kibernetike dhe demonstrimin e kapaciteteve të përbashkëta ushtarake, duke dërguar një mesazh të qartë për unitetin dhe gatishmërinë e NATO-s dhe aleatëve të saj përballë çdo sfide në rajon.
Stërvitja “Defender Europe 2025” synon gjithashtu të rrisë ndërveprueshmërinë mes forcave shumëkombëshe dhe të kontribuojë në ruajtjen e stabilitetit dhe sigurisë në Ballkan./Katror.info
