Kanë filluar zyrtarisht punimet për restaurimin e Galerisë Kombëtare të Kosovës, një nga institucionet më të rëndësishme të artit pamor në vend. Ky projekt, i mbështetur nga Ministria e Kulturës, synon transformimin e objektit aktual në një hapësirë moderne, funksionale dhe të përshtatshme për ekspozita dhe veprimtari të tjera kulturore.
Ministri i Kulturës, Rinisë dhe Sportit, Hajrullah Çeku, përmes një reagimi publik, theksoi rëndësinë e këtij investimi, duke e cilësuar atë si një hap konkret drejt modernizimit të infrastrukturës kulturore në Kosovë.
“Ky investim i rëndësishëm do të mundësojë përmirësimin e kushteve funksionale dhe teknike të objektit, duke krijuar një hapësirë moderne dhe të përshtatshme për ekspozim, krijimtari dhe aktivitete artistike. Përkushtimi ynë për zhvillimin dhe modernizimin e infrastrukturës kulturore po konkretizohet në terren, me projekte të mirëplanifikuara dhe me ndikim afatgjatë për komunitetin artistik dhe publikun,” shkroi ministri Çeku.
Mundesh me e lexu edhe…
Galeria Kombëtare, që për dekada ka shërbyer si një qendër e rëndësishme për ekspozimin dhe promovimin e artit bashkëkohor dhe tradicional, pritet të përfitojë nga ky projekt jo vetëm në aspektin estetik, por edhe në përmirësimin e kushteve për artistët dhe vizitorët.
Ky zhvillim është mirëpritur nga komuniteti artistik dhe qytetarët, të cilët e kanë vlerësuar përkushtimin institucional për të investuar në kulturë si një aset kombëtar./Katror.info
