Ka nisur zyrtarisht xhirimi i filmit më të ri artistik “Jerëm”, me regji dhe skenar nga Ismet Sijarina, një dramë psikologjike që premton të sjellë një rrëfim tronditës dhe emocional mbi mbijetesën, faljen dhe plagët që lë pas dhuna, shkruan Katror.info.
Filmi ndjek historinë e Erës, një gruaje të fortë por të brishtë, e cila përballet me realitete të dhimbshme në një botë distopike ku kufijtë mes viktimës dhe autorit, fajit dhe pafajësisë, bëhen gjithnjë e më të paqartë.
“Jerëm” është një bashkëprodhim ndërkombëtar i mbështetur nga Qendra Kinematografike e Kosovës, në partneritet me Shqipërinë dhe Maqedoninë e Veriut. Në rolet kryesore shfaqen emra të njohur të kinematografisë shqiptare si Luli Bitri, Genc Jakupi, Gresa Pallaska, Irena Aliu, Adem Karaga, Jonida Vokshi dhe Edon Rizvanolli.
Mundesh me e lexu edhe…
Producentë të filmit janë Leonora Lushtaku dhe vetë regjisori Ismet Sijarina, ndërsa në rolin e koproducentëve janë Dejan Iliev dhe Florenc Papas. Projekti është realizuar në bashkëpunim me shtëpitë filmike Thumbs Up (Kosovë), DMF DOO Production (Maqedonia e Veriut) dhe Tunnel Film (Shqipëri).
Filmi “Jerëm” pritet të zërë një vend të rëndësishëm në kinematografinë e rajonit, duke sjellë një narrativë të fuqishme dhe vizuale mbi traumën kolektive dhe luftën personale për shërim në një shoqëri të trazuar./Katror.info
