Kryeqyteti i Holandës, Amsterdami, prej disa kohësh po përballet me turma në rritje dhe rrugë të mbipopulluara dhe po zhvillon fushata të shumta për të reduktuar numrin e turistëve që e vizitojnë.
Amsterdami është, pa dyshim, një nga destinacionet turistike më të njohura në Evropë. Turistët shijojnë kanalet e tij romantike, muzetë fantastikë, ngjarjet argëtuese në natyrë… Kjo ndikon në jetën e banorëve, gjë që rregullorja e re e nxjerr në pah. Autoritetet e qytetit sapo kanë publikuar një listë të “rregullave për jetën dhe bashkëjetesën” në qytet, të cilat do të hyjnë në fuqi nga viti i ri.
Ato reduktojnë numrin e njësive akomoduese, kufizojnë hapjen e të rejave, por edhe ua lehtësojnë banorëve të rinj gjetjen e një apartamenti dhe hapjen e vendeve të punës që nuk kanë të bëjnë me turizmin.
Mundesh me e lexu edhe…
Ky qytet i bukur nuk mund të shkundë imazhin që i ka dhënë marihuana legale dhe rrethi i famshëm i dritave të kuqe. Për shkak të tyre, ai tërheq mysafirë që janë të interesuar për festa, që sillen egër dhe që nuk e vlerësojnë ofertën kulturore dhe arkitekturën e bukur. Me një grup të ri rregullash të sapo publikuara, kryeqyteti holandez po përpiqet të ndryshojë imazhin dhe reputacionin e tij dhe të nxjerrë në pah vlerat që e bëjnë atë një qytet të jetueshëm.
Edhe pse disa i kanë interpretuar rregullat si ndërhyrje, misioni i Amsterdamit është të riemërohet si një qytet që është më gjithëpërfshirës dhe i jetueshëm për banorët e tij. Ata nuk duan, thuhet, të jenë vetëm një park argëtimi për turistët. Nën moton “Ripërtërij këndvështrimin tënd”, u nis një fushatë që u drejtohet banorëve dhe vizitorëve potencialë.
Rregulloret që synojnë kufizimin e akomodimit privat në qytet dhe rritjen e furnizimit me apartamente për studentët, mësuesit dhe punonjësit e policisë kanë hyrë në fuqi që nga fillimi i vitit. Për çdo qark është përcaktuar një numër maksimal i njësive akomoduese private, i cili është 30 për qind më pak se ai i mëparshmi. Në qendrën strikte të qytetit, lejet e reja për apartamente nuk do të jepen për të paktën katër vjet.
Politika e qytetit do të jetë t’u japë përparësi strehimit të rinjve që kanë jetuar në qytet për të paktën gjashtë vjet. Në qendër të qytetit nuk do të jepen më leje për hapjen e dyqaneve të suvenireve, por do të inkurajohet hapja e dyqaneve të reja në pjesë të tjera të qytetit. Autoritetet planifikojnë të nxisin hapjen e librarive, palestrave, dyqaneve të veshjeve, salloneve të flokëve, gjithçka që u nevojitet banorëve. Prioriteti i tyre nuk janë më turistët dhe komoditeti i tyre, por ata që jetojnë në Amsterdam gjatë gjithë vitit.
Nëse plani i tyre do të ketë sukses, mbetet për t’u parë. Në një kohë kur shumë destinacione po shpenzojnë burime të mëdha për të tërhequr turistë, është një rast interesant i një qyteti që bën gjithçka për t’i penguar ata të vijnë. /Katror.info
Përgatiti:
