Kurrë mos thuaj kurrë! Dhe Mrizi i Zanave që tashmë është një histori suksesi agroturizmi ka dëshmuar se me punë dhe këmbëngulje mund skepticizmin dhe sjell rezultate konkrete, duke mundësuar kësaj radhe rikthimin e kultivimit të orizit në Fushën e Zadrimes pas 30 vjetësh. Siç është bërë e ditur vetë në një postim në rrjetet sociale, këtë vit prodhuan hiq më pak se mbi 7 mijë kilogramë oriz vendor.
“Përvoja e mirë e Mrizit të Zanave, ka dëshmuar se kultivimi i orizit në Shqipëri është jo vetëm një mundësi reale, por mund të realizohen edhe rendimente të larta e cilësi prodhimi shumë të mira,” ka vlerësuar këtë sukses Filip Haxhari, një gjenetist shqiptar që drejton departamentin e kërkimeve pranë Bankës Kombëtare të Orizit në Itali.Ai ka ndihmuar dhe inkurajuar pronarin e Mrizit të Zanave Altin Prengën që të mos i ndalë përpjekjet në kultivimin e orizit.
“Pas shumë e shumë vitesh, bima e orizit dhe orizorja e saj u shfaqen mrekullisht e në mënyrë të papritur e të pabesueshme, me madhështinë e krenarinë e tyre, në horizontet e ‘vendlindjes’ së saj, në fushën e Zadrimës,” ka shkruar Haxhari.
Mundesh me e lexu edhe…
Mrizi i Zanave përfaqëson një histori suksesi agrobiznesi me pronarin Altin Prenga, një pionier i lëvizjes së ushqimit të ngadaltë në Shqipëri dhe i merituar për kthimin e ushqimit shqiptar në bazë: prodhime të freskëta, organike nga ferma në tryezë.
“7000 kg oriz vendor me nje vlere te madhe ekonomike dhe morale, pa asnje hap mbrama dhe me nje mesazh per ju në Shqipëri. Nuk bën, mos e bëj, nuk ia vlen. Sikur për kuzhinën shqiptare në një zonë të braktisur, ashtu dhe për djathin, verën, zahiret, edhe për vajin dje, vreshtat llafet, që na kanë ndjekur ishin gjithmonë demoralizuese. Por këto llafe na bëjnë më të fortë. Falenderim i veçante për Gjenetistin presigjoz Filip Haxhari dhe çdo bashkëpunëtor,” thuhet në postimin e Mrizit të Zanave.
E Haxhari e përgëzon Altinin për këmbënguljen e tij.
“Pikërisht këtu, pas rreth 30 vitesh, biri i një familjeje të thjeshtë të kësaj toke, Altin Prenga, me një vullnet e këmbëngulje të rrallë, pas shumë përpjekjeve e jo pa pak sfida e vështirësi, por me përkushtimin që e karakterizon, arriti të kultivojë këtë bimë, duke besuar në te dhe duke hedhur farën e parë të orizit në këto toka.”
Ai tutje ka shkruar se duke kryer mbjelljen e kësaj bime, Altin Prenga, jo vetëm u bë pionieri i parë i rikthimit dhe i kultivimit të orizit në Shqipëri, por është edhe bashkatdhetari i parë që e bëri të mundur futjen e Shqipërisë në listën e FAO-s, si një ndër 122 vendet që kultivojnë e prodhojnë këtë bimë në shkallë botërore.
Sipas Haxharit, Shqipëria “ka fatin e madh sepse është një ndër vendet evropiane që ka kushtet më të përshtatshme për zhvillimin e kësaj kulture, për faktin se klima e thatë dhe e nxehtë e vendit, së bashku me tokat pjellore dhe të pashfrytëzuara, dhe me rezervat e mëdha ujore që ka ky vend (që, fatkeqësisht nuk shfrytëzohen e, si rrjedhim, shkojnë dëm e derdhen vetëm në det), jo vetëm janë shanse reale për zhvillimin e kësaj kulture në Shqipëri, por garantojnë rendimente shumë të larta dhe cilësi të kokrrës shumë më të mira se ai që vjen nga jashtë.”/Katror.info
Përgatiti:
