Një grup organizatash të shoqërisë civile, të bashkuara në kuadër të Koalicionit për Mbrojtjen e Fëmijëve në Kosovë (KOMF), organizuan sot një protestë para ndërtesës së Kuvendit të Kosovës, duke kërkuar veprim të menjëhershëm institucional për garantimin e të drejtave dhe mirëqenies së fëmijëve, shkruan Katror.info.
Të mbledhur në sheshin “Ibrahim Rugova”, protestuesit mbanin pankarta me mesazhin kryesor: “Karriget tuaja nuk vlejnë më shumë se jeta dhe mirëqenia e fëmijëve”, duke shprehur zhgënjimin ndaj bllokadës politike që, sipas tyre, ka ndikuar negativisht në politikat për fëmijët.
Protesta u organizua në prag të vazhdimit të seancës konstituive të Kuvendit, e cila është karakterizuar nga vonesa dhe mungesë e konsensusit politik. Sipas KOMF-it, kjo situatë ka lënë pezull shumë nisma ligjore dhe strategji që prekin drejtpërdrejt jetën e fëmijëve.
Mundesh me e lexu edhe…
“Si pasojë e kësaj bllokade, shumë politika që ndikojnë në mirëqenien e fëmijëve kanë mbetur të pa miratuara,” deklaroi Donjeta Kelmendi, drejtoreshë ekzekutive e KOMF-it. Ajo u bëri thirrje deputetëve të reflektojnë mbi rolin e tyre kushtetues dhe përgjegjësinë për të vepruar pa vonesë.
Kelmendi theksoi se çdo ditë vonesë në marrjen e vendimeve është një barrë që rëndon mbi fëmijët: “Çdo vendim i vonuar është një barrë që fëmijët e paguajnë me shëndetin, mirëqenien dhe, në raste të caktuara, me jetën e tyre.”
Protesta u zhvillua në mënyrë paqësore dhe zgjati rreth një orë, ndërsa organizatorët paralajmëruan vazhdim të reagimeve nëse nuk do të ketë ndryshime konkrete nga ana e institucioneve./Katror.info
