Ndërmarrja Rajonale e Pastrimit KRM “Pastrimi” ka reaguar sot lidhur me situatën e rënduar të grumbullimit të mbeturinave në kryeqytet, duke theksuar se kontrata e re e nënshkruar për mirëmbajtjen e hapësirave publike përfaqëson vetëm një hap fillestar dhe nuk zgjidh problemin themelor të shërbimeve bazë të pastrimit, shkruan Katror.info.
Në një njoftim për media, “Pastrimi” ka bërë të ditur se ka kërkuar një takim urgjent me Komunën e Prishtinës për të diskutuar çështjet kyçe që po e pengojnë funksionimin e rregullt të ndërmarrjes. Sipas njoftimit, pagesat e papaguara për më shumë se katër muaj po e pamundësojnë rifillimin e operimeve normale në terren.
“Kërkojmë bashkëpunim të plotë për zgjidhje afatgjate dhe stabilitet financiar, në mënyrë që të kthehemi sa më parë në ofrimin e shërbimeve për qytetarët,” thuhet në reagim.
Mundesh me e lexu edhe…
Situata me mbeturinat ka shkaktuar shqetësim të madh tek qytetarët e Prishtinës, ndërsa autoritetet lokale ende nuk kanë komentuar publikisht për kërkesat e ndërmarrjes./Katror.info
